កំពង់ស្ពឺ៖ ដោយបានទទួលការចាត់តាំងពីឯកឧត្តម ចាយ បូរិន រដ្ឋមន្ត្រីក្រសួងធម្មការ និងសាសនា នាព្រឹកថ្ងៃសុក្រ ៤ កើត ខែផល្គុន ឆ្នាំម្សាញ់ សប្តស័ក ពស ២៥៦៩ ត្រូវនឹងថ្ងៃទី២០ខែកុម្ភៈ ឆ្នាំ២០២៦ ឯកឧត្តម ឈួរ សុបញ្ញា រដ្ឋលេខាធិការក្រសួងធម្មការ និងសាសនា បានអញ្ជើញចូលរួមជាអធិបតីជាមួយព្រះមុនីសត្ថាចារ្យកោសល កែវ ចន្ថា ព្រះមេគណខេត្តមហានិកាយ ព្រះមុនីតាលវ័ន មួង ចក្រី ព្រះមេគណខេត្តគណៈធម្មយុត្តិកនិកាយ ក្នុងពិធីផ្សព្វផ្សាយខ្លឹមសារសង្ឃប្រកាសអនុសំវច្ឆរមហាសន្និបាតមន្រ្តីសង្ឃទូទាំងប្រទេស លើកទី៣៣ ប្រចាំឆ្នាំ២០២៥ និងលើកទិសដៅការងារឆ្នាំ២០២៦ សម្រាប់ខេត្តកំពង់ស្ពឺ ដោយមានការនិមន្តចូលរួមពីព្រះមន្ត្រីសង្ឃ ព្រះសង្ឃ សមណសិស្ស និងការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រី ប្រធាន អនុប្រធានមន្ទីរអង្គភាពជុំវិញខេត្ត និងគណៈកម្មការ អាចារ្យ ក្នុងខេត្តកំពង់ស្ពឺ សរុបប្រមាណជា ១.១៨២អង្គ/នាក់ ដែលរៀបចំឡើងនៅក្នុងបរិវេណវត្ត ដំណាក់ត្រាច ស្ថិតក្នុងឃុំដំបូករូង ស្រុកភ្នំស្រួច ខេត្តកំពង់ស្ពឺ។
ព្រះមុនីសត្ថាចារ្យកោសល កែវ ចន្ថា ព្រះមេគណខេត្តមហានិកាយ និងព្រះមេគណខេត្តគណៈធម្មយុត្តិកនិកាយ មានសង្ឃដិកាថា ពិធីផ្សព្វផ្សាយ ខ្លឹមសារសង្ឃប្រកាសអនុសំវច្ឆរមហាសន្និបាតមន្រ្តីសង្ឃទូទាំងប្រទេស លើកទី៣៣ ប្រចាំឆ្នាំ២០២៥ និងលើកទិសដៅការងារឆ្នាំ២០២៦ ក្រោមបរិយាកាសដែលព្រះរាជាណាចក្រកម្ពុជា មានសុខដុមរមនា ប្រកបដោយស្មារតីឯកភាព សាមគ្គីភាព ក្នុងការការពារ និងថែរក្សាសណ្ដាប់ធ្នាប់របៀបរៀបរយ របស់ប្រទេសជាតិ និងតម្លៃព្រះពុទ្ធសាសនា ជាពិសេសគណៈសង្ឃនាយក គណៈមហានិកាយ នៃព្រះ រាជាណាចក្រកម្ពុជា តែងតែចូលរួមសហការជាមួយក្រសួងធម្មការនិងសាសនា តែងតែបានរៀបចំអនុសំវច្ឆរមហាសន្និបាត មន្រ្តីសង្ឃទូទាំងប្រទេស ប្រចាំឆ្នាំនីមួយៗ ដើម្បីត្រួតពិនិត្យលើកការ អនុត្ដន៍ខ្លឹមសារសង្ឃប្រកាសកន្លងមក និងលើកទិសដៅការងារសម្រាប់ឆ្នាំបន្ដទៀត។
ក្នុងឱកាសនោះ ឯកឧត្តម ឈួរ សុបញ្ញា បានថ្លែងថា ពិធីផ្សព្វផ្សាយខ្លឹមសារសង្ឃប្រកាសអនុសំវច្ឆរមហាសន្និបាតមន្ត្រីសង្ឃទូទាំងប្រទេស លើកទី៣៣នេះ គឺប្រព្រឹត្តទៅប្រកបដោយមហាសាមគ្គីភាពដ៏ទូលំទូលាយ និងស្និទ្ធស្នាលបំផុត ក្នុងវិស័យសាសនា ស្របពេលដែលប្រជាជនកម្ពុជាយើង កំពុងរស់នៅក្រោមម្លប់ដ៏ត្រជាក់ របស់អង្គព្រះមហាក្សត្រជាទីគោរពសក្ការៈ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី និងក្រោមការយកចិត្តទុកដាក់របស់ប្រមុខរាជរដ្ឋាភិបាលកម្ពុជា ដែលមានសម្តេចមហាបវរធិបតី ហ៊ុន ម៉ាណែត បានសម្រេចដាក់ព្រះពុទ្ធសាសនាចូលក្នុងកម្មវិធីអប់រំតាមសាលារៀនរដ្ឋ និងឯកជនផងដែរ។ ការជួបជុំនាពេលនេះពិតជាមានសារៈ សំខាន់ណាស់ ដើម្បីកែលម្អបទដ្ឋាន និងគោលការណ៍ សម្រាប់ដឹកនាំ និងគ្រប់គ្រងព្រះពុទ្ធសាសនា ក៏ដូចជាការដាក់ចេញនូវយុទ្ធសាស្ត្រ ដើម្បីលើកកម្ពស់គុណតម្លៃ និងតួនាទីរបស់ព្រះពុទ្ធសាសនា នៅក្នុងសង្គមខ្មែរ។
ឯកឧត្តមរដ្ឋលេខាធិការ បានបន្តទៀតថា ក្នុងនាមថ្នាក់ដឹកនាំក្រសួងធម្មការ និងសាសនា ទទួលខុសត្រូវកិច្ចការសាសនាខេត្តកំពង់ស្ពឺ តាមការចាត់តាំងរបស់ឯកឧត្តមរដ្ឋមន្រ្តី ប្តេជ្ញាចិត្តក្នុងការត្រៀមលក្ខណៈជានិច្ចក្នុងការសហការជាមួយនឹងគណៈសង្ឃ ក្នុងខេត្តកំពង់ស្ពឺ ដើម្បីអនុវត្តឱ្យខាងតែបាននូវខ្លឹមសារនៃសង្ឃ ប្រកាសអនុសំវច្ឆរមហាសន្និបាតមន្ត្រីសង្ឃទូទាំងប្រទេស លើកទី៣៣។
ឯកឧត្តម ឈួរ សុបញ្ញា ក៏បានលើកទឹកចិត្តរក្សាឱ្យបាននូវស្មារតីសាមគ្គីភាពជាធ្លុងមួយ ដើម្បីបន្តរៀបចំ និងអនុវត្តផែនការថ្មីៗ ស្របតាម គោលនយោបាយ លើកកម្ពស់សាសនារបស់រដ្ឋ តម្លៃសីលធម៌សង្គម និងសុខដុមនីយកម្មសាសនា សំដៅលើកតម្កើងគុណតម្លៃព្រះពុទ្ធសាសនា លើកស្ទួយតម្លៃវប្បធម៌ អរិយធម៌ ប្រពៃណី ទំនៀមទំលាប់ ខ្មែរឱ្យបានរុងរឿង និងគង់វង្ស ព្រមទាំងលើកកម្ពស់សីលធម៌សង្គម និងសុខដុមនីយកម្មសាសនា ក្នុងសង្គមជាតិផងដែរ ៕
