មណ្ឌលគីរី៖ កាលពីថ្ងៃចន្ទ ទី១៧ ខែវិច្ឆិកា ឆ្នាំ២០២៥ ម្សិលមិញនេះ ឯកឧត្តម នាយឧត្តមសេនីយ៍ ពិន ពិសិដ្ឋ ប្រធានក្រុមប្រតិបត្តិការទី២ និង ឯកឧត្ដម ឧត្តមសេនីយ៍ឯក ស សេរីវិចិត្រ អនុប្រធានក្រុមប្រតិបត្តិការទី២ និងជាប្រធានចុះត្រួតពិនិត្យគោលដៅ ខេត្ដមណ្ឌលគីរី ខេត្តរតនគីរី បានដឹកនាំក្រុមការងារ នៃអគ្គនាយកដ្ឋានអន្តោប្រវេសន៍ ចុះមកខេត្តមណ្ឌលគីរី ដើម្បីអនុវត្តផែនការ ០០៣ ផក របស់ក្រសួងមហាផ្ទៃ ទទួលបានលទ្ធផលដូចខាងក្រោម៖
១. ជួបសម្តែងការគួរសម ជាមួយ ឯកឧត្តម ថង សាវុន អភិបាល នៃគណៈអភិបាលខេត្ត ព្រមទាំងឯកឧត្តម អភិបាលរង ស្នងការរង ទទួលផែនអន្តោប្រវេសន៍ ដើម្បីប្រជុំ និងពិភាក្សាអំពីវឌ្ឍនភាពការងារត្រួតពិនិត្យវត្តមានរបស់ជនបរទេស និងផ្សព្វផ្សាយនិយាមប្រតិបត្តិ (SOP) សម្រាប់អនុវត្តក្នុងការត្រួតពិនិត្យវត្តមានជនបរទេសនៅតាមសណ្ឋាគារ និងផ្ទះសំណាក់។
២. ឯកឧត្តម ឧត្តមសេនីយ៍ឯក ស សេរីវិចិត្រ បានដឹកនាំកិច្ចប្រជុំជំនាញផ្ទៃក្នុង ដោយមានចូលរួមពីលោកស្នងការរងទទួលផែនអន្តោប្រវេសន៍ នាយការិយាល័យ នាយរងការិយាល័យ អធិការស្រុក នាយប៉ុស្តិ៍រដ្ឋបាល និងមន្ត្រីពាក់ព័ន្ធ ដើម្បីផ្សព្វផ្សាយនិយាមប្រតិបត្តិ (SOP) ជូនដល់មន្ត្រីមូលដ្ឋាន និងពិភាក្សាលើបញ្ហាប្រឈម មួយចំនួន ព្រមទាំងសំណូមពរ។
៣. រៀបចំផែនការ និងចុះត្រួតពិនិត្យ តាមសណ្ឋាគារ ផ្ទះសំណាក់ រីស៊ត ចំនួន ៤ទីតាំង ក្នុងខេត្តមណ្ឌលគីរី នៅព្រឹកថ្ងៃទី១៨ ខែវិច្ឆិកា ឆ្នាំ២០២៥ ៕
