ភ្នំពេញ៖ នារសៀលថ្ងៃទី២០ ខែកញ្ញា ឆ្នាំ២០២៥ នៅក្នុងអំឡុងសម័យប្រជុំពេញអង្គលើកទី២ នៃមហាសន្និបាតអាយប៉ាលើកទី៤៦ (46th AIPA) ឯកឧត្តមបណ្ឌិត ចែម វីឌ្យ៉ា ប្រធានគណៈកម្មការទី៥ព្រឹទ្ធសភា ត្រូវបានមហាសន្និបាតអាយប៉ាលើកទី៤៦ អនុម័តតែងតាំងជាអគ្គលេខាធិការអាយប៉ាថ្មី (លើកទី៧) សម្រាប់អាណត្តិ ២០២៦-២០២៨។
ជារួម មហាសន្និបាតអាយប៉ាលើកទី៤៦ ដែលប្រព្រឹត្តទៅពីថ្ងៃទី១៧ ដល់ថ្ងៃទី២១ ខែកញ្ញា ឆ្នាំ២០២៥ នៅប្រទេសម៉ាឡេស៊ី ក្រោមប្រធានបទ “សភាទៅមុខសម្រាប់កំណើនប្រកបដោយបរិយាបន្ន និងអាស៊ានប្រកបដោយចីរភាព” បានអនុម័តសេចក្តីព្រាងសេចក្តីសម្រេចចំនួន៤២ ដែលក្នុងនោះ មានសេចក្តីសម្រេចចំនួនបី ផ្តួចផ្តើមឡើងដោយសភាកម្ពុជា រួមមាន៖ ១). សេចក្តីសម្រេចស្តីពីការជំរុញគំនិតផ្ដួចផ្ដើមសន្តិភាព ដើម្បីមនុស្សជាតិ និងភពផែនដី, ២). សេចក្ដីសម្រេចស្តីពីការបង្កើតវេទិកាថ្នាក់ដឹកនាំអាយប៉ា និង៣). សេចក្ដីសម្រេចស្តីពីការបង្កើតភាពជាដៃគូអាយប៉ាដើម្បីលើកកម្ពស់ការចូលរួមរបស់អាយប៉ាជាមួយដៃគូពាក់ព័ន្ធ សម្រាប់អាស៊ានប្រកបដោយបរិយាបន្ន និងចីរភាព។ សភាសង្កេតការណ៍ដែលបានចូលរួម មានចំនួន១៤ប្រទេស ហើយសភាដែលនឹងធ្វើជាម្ចាស់ផ្ទះ នៃមហាសន្និបាតអន្តរសភាអាស៊ានបន្ទាប់ លើកទី៤៧ គឺសភានៃសាធារណរដ្ឋហ្វីលីពីន ៕
