ភ្នំពេញ៖ កាលពីព្រឹកថ្ងៃទី១៨ ខែសីហា ឆ្នាំ២០២៥ នៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤ បានដំណើរការផ្សព្វផ្សាយសភាពការណ៍ថ្មីៗ ស្ដីពីសង្គ្រាមឃ្លានពានកម្ពុជា និងការរំលោភបទឈប់បាញ់ពីសំណាក់ភាគីថៃ មកលើដែនអធិបតេយ្យភាពកម្ពុជា ដែលពិធីផ្សព្វផ្សាយនេះ ស្ថិតក្រោមអធិបតីភាពឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងដោយមានការចូលរួមពីយោធិនចំណុះទីបញ្ជាការតំបន់ប្រតិបត្តិការសឹករងកំពង់ធំជាច្រើននាក់។
ឧត្តមសេនីយ៍ទោ សោម ស៊ុន បានផ្សព្វផ្សាយខ្លឹមសារកិច្ចព្រមព្រៀងចំនួន ១៣ចំណុច នៃការអនុវត្តបទឈប់បាញ់ ដែលបានឯកភាពគ្នាចុះហត្ថលេខាក្នុងកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) របស់ប្រមុខក្រសួងការពារជាតិទាំងពីរ នៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី៧ ខែសីហា ឆ្នាំ២០២៥ កន្លងទៅ និងសកម្មភាពជាក់ស្ដែងនៃការរំលោភបទឈប់បាញ់យ៉ាងគឃ្លើន ជាបន្តបន្ទាប់ របស់ភាគីថៃមកលើដែនអធិបតេយ្យភាពរបស់ព្រះរាជាណាចក្រកម្ពុជា។ តែវីរយុទ្ធជនដ៏អង់អាចក្លាហានរបស់យើង ក្រោមការដឹកនាំបញ្ជាដ៍ម៉ឺងម៉ាត់របស់សម្ដេចតេជោធិបតី និងមេបញ្ជាការគ្រប់លំដាប់ថ្នាក់ នៃកងយុទ្ធពលខេមរភូមិន្ទ បានធ្វើការអត់ធ្មត់ក្នុងកម្រិតខ្ពស់ ដើម្បីគោរពយ៉ាងម៉ឺងម៉ាត់នូវបទឈប់បាញ់ ដែលមានការគាំទ្រនិងសម្របសម្រួលពីរឯកឧត្តម ដូណាល់ត្រាំ ប្រធានាធិបតីសហរដ្ឋអាមេរិក និងតំណាងសាធារណរដ្ឋប្រជាមានិតចិន ព្រមទាំងប្រធានាធិបតីម៉ាឡេស៊ី ដែលជាប្រធានអាស៊ានប្ដូរវេនផងដែរ។
ឧត្តមសេនីយ៍ទោ សោម ស៊ុន ក៏បានផ្សព្វផ្សាយ ពីសកម្មភាពរបស់លោក ម៉ៃឃើល អាល់ហ្វូរ៉ូ អ្នកយកព័ត៌មានការពិតនៅសហរដ្ឋអាមេរិក ដែលបានផ្សព្វផ្សាយជូនដល់ពិភពលោក និងប្រធានាធិបតី ដូណាល់ត្រាំ ស្ដីពីការរំលោភបំពានបទឈប់បាញ់របស់ភាគីថៃ មកលើទឹកដីនិងប្រជាជនកម្ពុជា ដែលបានធ្វើឲ្យពិភពលោកបានយល់ច្បាស់អំពីការពិតនូវឧបាយកល និងសកម្មភាព ដ៍ពឹសពុល ដោយគ្មានការកោតក្រែងក្នុងការមិនគោរពបទឈប់បាញ់របស់ភាគីថៃ មកលើកម្ពុជា។
ឧត្តមសេនីយ៍ទោ សោម ស៊ុន បានប្រគល់ភារកិច្ចជូនកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំទាំងអស់ ត្រូវបន្តត្រៀមខ្លួននិងគ្រឿងបំពាក់គ្រប់គ្រាន់ ដើម្បីអនុវត្តតាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ក្នុងភារកិច្ចការពារជាតិ និងការពារបូរណភាពទឹកដី។
ជាមួយនោះដែរឧត្តមសេនីយ៍ទោ សោម ស៊ុន ក៏បានអំពាវនាវ ដល់កងទ័ព គ្រួសារកងទ័ព និងប្រជាពលរដ្ឋ ត្រូវពហិកា មិនត្រូវប្រើប្រាស់ផលិតផលឬទំនិញថៃ នឹងត្រូវផ្សព្វផ្សាយជូនប្រជាពលករយើងដែលបានវិលត្រឡប់មកពីប្រទេសថៃវិញ ឱ្យគាត់បានយល់ជ្រូតជ្រាបអំពីសេចក្តីប្រកាសរបស់ក្រសួងការងារ ដែលមានកន្លែងធ្វើការងាររាប់ម៉ឺនកន្លែងទទួលបងប្អូន ដើម្បីបង្កលក្ខណៈងាយស្រួលឲ្យគាត់រកការងារធ្វើនៅក្នុងប្រទេស មានចំណូលសមរម្យ និងបង្កើនសេដ្ឋកិច្ចជាតិ រួមចំណែកក្នុងការកសាងអភិវឌ្ឍន៍ព្រះរាជាណាចក្រកម្ពុជារបស់យើង ក្នុងសុខសន្តិភាពឱ្យមានការអភិវឌ្ឍរីកចម្រើនរុងរឿងថែមទៀត ក្រោមការដឹកនាំប្រកបដោយគតិបណ្ឌិតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ៕
