ភ្នំពេញ៖ នារសៀលថ្ងៃទី១ ខែកក្កដា ឆ្នាំ២០២៥ ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ បានអញ្ជើញដឹកនាំកិច្ចប្រជុំពិភាក្សាលើសេចក្តីព្រាង «អនុក្រឹត្យស្តីពីការបង្កើតគណៈកម្មាធិការលើកកម្ពស់អភិបាលកិច្ចក្រសួង ស្ថាប័នចំណុះអង្គការនីតិប្រតិបត្តិ (គ.ក.អ.)»។ កិច្ចប្រជុំនេះ មានការអញ្ជើញចូលរួមពី តំណាងក្រសួង ស្ថាប័នទាំង៣១ លេខាធិការដ្ឋានកែទម្រង់ទាំង៥វិស័យ ព្រមទាំងថ្នាក់ដឹកនាំ និងមន្រ្តីបច្ចេកទេសក្រសួងមុខងារសាធារណៈជាច្រើនរូប។
ការរៀបចំបង្កើត គ.ក.អ. នេះ គឺដើម្បីទទួលបន្ទុកដឹកនាំ សម្របសម្រួលការអនុវត្តការងារកែទម្រង់នៅតាមក្រសួង ស្ថាប័នដែលរួមមាន ការកែទម្រង់រដ្ឋបាលសាធារណៈ ការកែទម្រង់ការគ្រប់គ្រង់ហិរញ្ញវត្ថុសាធារណៈ ការកែទម្រង់វិមជ្ឈការនិងវិសហមជ្ឈការ និងការកែទម្រង់ច្បាប់ សំដៅលើកកម្ពស់អភិបាលកិច្ចក្នុងក្របខណ្ឌសមត្ថកិច្ចរបស់ក្រសួង ស្ថាប័ន។
ទន្ទឹមនេះ គ.ក.អ. ជាយន្តការរួមរបស់ក្រសួង ស្ថាប័ន ដែលមានតួនាទីដឹកនាំ គាំទ្រ សម្របសម្រួល ជំរុញ និងធានានូវការអនុវត្តការងារកែទម្រង់លើកកម្ពស់អភិបាលកិច្ចរបស់រាជរដ្ឋាភិបាលក្នុងក្រសួង ស្ថាប័នប្រកបដោយសង្គតិភាព សុខដុមនីយកម្ម និងស័ក្តិសិទ្ធភាព ដើម្បីលើកកម្ពស់អភិបាលកិច្ចរបស់ក្រសួង ស្ថាប័នសាមី ៕
