អភិបាលខេត្តបាត់ដំបង ក្រើនរំលឹកគណៈបញ្ជាការឯកភាពរដ្ឋបាល ក្រុង ស្រុក ត្រូវបង្កើនកិច្ចសហការ ដេីម្បីរួមគ្នាបង្ក្រាប និងទប់ស្កាត់បទល្មើសឆបោកតាមប្រព័ន្ធបច្ចេកវិទ្យា

ភ្នំពេញ៖ នារសៀលថ្ងៃទី១៨ ខែកក្កដា ឆ្នាំ២០២៥ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង បានអញ្ជើញដឹកនាំកិច្ចប្រជុំពិភាក្សាការងារចាំបាច់មួយចំនួនរបស់រដ្ឋបាលខេត្តបាត់ដំបង។ ដោយមានការចូលរួមពី លោក លោកស្រីអភិបាលរងខេត្ត លោកនាយករដ្ឋបាលសាលាខេត្ត លោកប្រធានមន្ទីរអង្គភាពនានា កងកម្លាំងទាំង៣ប្រភេទ លោកអភិបាលក្រុង ស្រុកទាំង១៤ និងអ្នកពាក់ព័ន្ធផ្សេងទៀតដោយអនុវត្តតាមបទបញ្ជាយ៉ាងម៉ឺងម៉ាត់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដើម្បីរួមគ្នាក្នុងការបង្ក្រាប និងទប់ស្កាត់បទល្មើសឆបោកតាមប្រព័ន្ធបច្ចេកវិទ្យា និងល្បែងស៊ីសងខុសច្បាប់តាមអនឡាញគ្រប់ប្រភេទឲ្យអស់ពីមូលដ្ឋាន និងទប់ស្កាត់មិនឲ្យត្រឡប់មកវិញបានជាដាច់ខាត។

ក្នុងកិច្ចប្រជុំនេះ ឯកឧត្តម សុខ លូ អភិបាលខេត្ត បានណែនាំថា កិច្ចការនេះគឺជាកិច្ចការអាទិភាព ជាការងារចាំបាច់បំផុតសម្រាប់អាជ្ញាធរ ក៏ដូចជាកងកម្លាំង មានសមត្ថកិច្ចគ្រប់លំដាប់ថ្នាក់ និងមន្ទីរ អង្គភាពពាក់ព័ន្ធ ត្រូវបង្កើនការយកចិត្តទុកដាក់ និងទទួលខុសត្រូវខ្ពស់ក្នុងការដោះស្រាយបញ្ហានេះឲ្យមានប្រសិទ្ធភាពខ្ពស់។

ឯកឧត្តមអភិបាលខេត្ត បានក្រើនរំលឹកគណៈបញ្ជាការឯកភាពរដ្ឋបាលក្រុងស្រុក ត្រូវបង្កើនកិច្ចសហការគ្នាដើម្បីទប់ស្កាត់បញ្ហាខាងលើនេះឲ្យទទួលបានជោគជ័យស្របទៅតាមបទបញ្ជារបស់រាជរដ្ឋាភិបាលស្ដីពីការអនុវត្ត ប្រតិបត្តិការប្រយុទ្ធប្រឆាំងបទល្មើសឆបោកតាមប្រព័ន្ធបច្ចេកវិទ្យា និងសេចក្តីណែនាំនានា ដែលរាជរដ្ឋាភិបាលបានដាក់ចុះឲ្យអនុវត្ត ត្រូវធ្វើការតាមដានត្រួតពិនិត្យ ជាប្រចាំទៅលើទីតាំងដែលសង្ស័យ និង ត្រូវមានរបាយការណ៍ ករណីចាំបាច់ត្រូវសុំគោលការណ៍ពីថ្នាក់លើដើម្បីមានវិធានការឲ្យទាន់សភាពការណ៍។

ឯកឧត្តម សុខ លូ បានបញ្ជាក់ថា ការងារនេះជាការងារអាទិភាព ត្រូវតែអនុវត្តឲ្យបានម៉ឺងម៉ាត់ជាទីបំផុតដោយមិនអនុញ្ញាតឲ្យមានបទល្មើសគ្រប់ប្រភេទ ជាពិសេសគឺបទល្មើសបច្ចេកវិទ្យាអនឡាញស្គេម (Online Scams) កើតមាននៅក្នុងមូលដ្ឋានរបស់យើងជាដាច់ខាត នេះគឺជាបទបញ្ជាយ៉ាងម៉ឺងម៉ាត់ ប្រសិនបើសមត្ថកិច្ច អាជ្ញាធរ អង្គភាពពាក់ព័ន្ធ ឬក្រុមហ៊ុន សហគ្រាសណាមិនសហការគឺថ្នាក់ដឹកនាំនឹងចាត់វិធានការទៅតាមផ្លូវច្បាប់ ដោយមិនមានការលើកលែងនោះឡើយ។ 

ក្នុងឱកាសនេះ ឯកឧត្តមបានបន្តណែនាំ អភិបាលក្រុងស្រុកឲ្យបន្តយុទ្ធនាការ ផ្ទះ១ខ្នង ដើមឈើ១ដើម បន្ថែមទៀតដោយដាំដើមឈើតាមដងផ្លូវ ទីសាធារណៈ ទីប្រជុំជន។

ជាចុងក្រោយ ឯកឧត្តម សុខ លូ បានណែនាំអាជ្ញាធរមូលដ្ឋានត្រូវយកចិត្តទុកដាក់ខ្ពស់ ប្តេជ្ញា និងទទួលខុសត្រូវឲ្យបានច្បាស់លាស់ក្នុងមូលដ្ឋានខ្លួន អនុវត្តគោលការណ៍ភូមិឃុំមានសុវត្ថិភាព ៧ចំណុចផងដែរ ៕