ភ្នំពេញ៖ ក្នុងឱកាសធ្វើដំណើរឆ្ពោះទៅខេត្តបន្ទាយមានជ័យ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល រួមជាមួយថ្នាក់ដឹកនាំ នាព្រឹកថ្ងៃពុធ ទី២៩ ខែកក្កដា ឆ្នាំ២០២៥ បានអញ្ជើញចុះសួរសុខទុក្ខវីរកងទ័ព និងបងប្អូនប្រជាពលរដ្ឋ ដែលកំពុងសម្រាកព្យាបាល នៅមន្ទីរពេទ្យបង្អែកមិត្តភាពកម្ពុជា-ជប៉ុន មង្គលបូរី ខេត្តបន្ទាយមានជ័យ ដោយមានការយកចិត្តទុកដាក់ខ្ពស់ពី ថ្នាក់ដឹកនាំ និងអ្នកជំនាញបច្ចេកទេសពីក្រសួងសុខាភិបាល ការចូលរួមគាំទ្រពីមន្ទីរពេទ្យជាតិ មិត្តភាពកម្ពុជា-ចិន ព្រះកុសុមៈផងដែរ។
បន្ថែមពីនេះ ឯកឧត្តមសាស្រ្តាចារ្យរដ្ឋមន្រ្តី បានសំដែងនូវការកោតសរសើរ និងថ្លែងអំណរគុណដល់ ថ្នាក់ដឹកនាំ មន្រ្តីរាជការ បុគ្គលិកសុខាភិបាល នៃមន្ទីរពេទ្យខេត្តបន្ទាយមានជ័យ ក្នុងការបម្រើសេវាសុខាភិបាល ជូនប្រជាពលរដ្ឋ និងវីរកងទ័ព ដោយទឹកចិត្ត និងឆន្ទៈខ្ពស់។
ឯកឧត្តមសាស្រ្តាចារ្យរដ្ឋមន្រ្តី បានពាំនាំប្រគល់ជូនអំណោយមួយចំនួន ដល់មន្រ្តីសុខាភិបាលខេត្តបន្ទាយមានជ័យ ដើម្បីជាលើកទឹកចិត្តដល់មន្រ្តីសុខាភិបាល ដែលខិតខំក្នុងបំពេញការងារយ៉ាងសកម្ម មុះមត់ ជាមួយស្មារតីទទួលខុសត្រូវ ក្នុងនាមជាកងទ័ពអាវស ៕
