ព្រៃវែង៖ ឯកឧត្តម វង សូត្រ អនុប្រធានទី២រដ្ឋសភា បានលើកទឹកចិត្តដល់ក្មួយៗសិស្សានុសិស្ស ឱ្យសម្លឹងមើលឱកាសនៃការបណ្តុះបណ្តាលវិជ្ជាជីវៈ ដើម្បីចាប់យកជំនាញច្បាស់លាស់សម្រាប់ខ្លួនឯង និងឈានទៅបង្កើតមុខរបរ សំដៅលើកស្ទួយជីវភាពគ្រួសារ។
ឯកឧត្តមបានគូសបញ្ជាក់ថា រាជរដ្ឋាភិបាលបាននិងកំពុងយកចិត្តទុកដាក់លើការបណ្តុះបណ្តាលវិជ្ជាជីវៈ ដោយផ្តល់ការបណ្តុះបណ្តាលដោយឥតគិតថ្លៃ ជាពិសេសសម្រាប់យុវជនមកពីគ្រួសារក្រីក្រ និងងាយរងគ្រោះ ដើម្បីផ្តល់ឱកាសឱ្យពួកគេទទួលបានជំនាញច្បាស់លាស់ ក្នុងរយៈពេលខ្លី ដើម្បីចាប់យមុខរបរ បង្កើតចំណូលអាចកម្ពស់ជីវភាពគ្រួសារ និងសេដ្ឋកិច្ចជាតិ។
អនុសាសន៍ដ៏មានសារសំខាន់នេះ បានធ្វើឡើងក្នុងឱកាសដែល ឯកឧត្តមជួបសំណេះសំណាលជាមួយសិស្សានុសិស្សដែលទទួលបានលទ្ធផលល្អក្នុងការប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០២៥-២០២៦ មកពីវិទ្យាល័យជាច ស្ថិតក្នុងឃុំជាច ស្រុកកំចាយមារ ខេត្តព្រៃវែង នាព្រឹកថ្ងៃទី១៣ ខែកញ្ញា ឆ្នាំ២០២៦ ៕