កំពង់ឆ្នាំង៖ នាព្រឹកថ្ងៃទី២១ ខែកក្កដា ឆ្នាំ២០២៦នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. និងជាប្រធានក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក) តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវ: បានអញ្ជើញជាសហអធិបតីក្នុងពិធីផ្សព្វផ្សាយ “ច្បាប់ស្តីពីចរាចរណ៍ផ្លូវគោក សុវត្ថិភាពក្នុងការធ្វើដំណើររបស់កម្មករនិយោជិត និងសុវត្ថិភាពក្នុងការដឹកជញ្ជូន ជូនអ្នកបើកបរយានយន្តដឹកជញ្ជូនកម្មករនិយោជិត និងកម្មករនិយោជិត” នៅរោងចក្រ TRIPOS INTERNATIONAL CO., LTD. ដែលមានអ្នកចូលរួមប្រមាណជាង ៣០០នាក់។
ក្នុងពិធីផ្សព្វផ្សាយនេះ ឯកឧត្តមបណ្ឌិតប្រធានក្រុមការងារ ស.ផ.ក បានថ្លែងថា៖ ការបន្តចុះអប់រំផ្សព្វផ្សាយច្បាប់ស្តីពីចរាចរណ៍ផ្លូវគោកនៅតាមរោងចក្រ សហគ្រាស គឺជាយន្តការដ៏សំខាន់ក្នុងការលើកកម្ពស់ការយល់ដឹងអំពីសុវត្ថិភាពផ្លូវគោក និងហានិភ័យនៃគ្រោះថ្នាក់ចរាចរណ៍ដល់បងប្អូនកម្មករនិយោជិត។ ឯកឧត្តមបណ្ឌិត បានគូសបញ្ជាក់ថា ទោះបីជាការផ្សព្វផ្សាយនេះមិនអាចទប់ស្កាត់គ្រោះថ្នាក់ចរាចរណ៍បានទាំងស្រុងក៏ដោយ ប៉ុន្តែវាជាផ្នែកមួយយ៉ាងសំខាន់ក្នុងការដាស់តឿនស្មារតីដល់អ្នកបើកបររថយន្តដឹកជញ្ជូនកម្មករនិយោជិត និងបងប្អូនកម្មករនិយោជិតទាំងអស់ ឱ្យប្រកាន់ខ្ជាប់នូវស្មារតីទទួលខុសត្រូវចំពោះមុខច្បាប់។ លើសពីនេះ ត្រូវចេះទទួលខុសត្រូវលើអាយុជីវិត និងវាសនារបស់ខ្លួនឯង ព្រមទាំងអ្នកដទៃ ព្រោះការធ្វេសប្រហែសតែមួយពព្រិចភ្នែករបស់អ្នកបើកបរ អាចបង្កជាមហន្តរាយ និងការបាត់បង់ដែលមិនអាចយកមកវិញបានឡើយ។
ជាមួយគ្នានេះដែរ ឯកឧត្តមបណ្ឌិតប្រធានក្រុមការងារ ក៏បានអំពាវនាវដល់អ្នកបើកបររថយន្តដឹកជញ្ជូនកម្មករនិយោជិត បន្តប្រើប្រាស់រថយន្តប្រភេទដឹកអ្នកដំណើរ សម្រាប់ដឹកជញ្ជូនកម្មករនិយោជិតបន្តទៀត ចៀសវាងប្រើប្រាស់រថយន្តប្រភេទដឹកទំនិញ មកដឹកជញ្ជូនកម្មករនិយោជិត ជាពិសេសត្រូវឧស្សាហ៍ត្រួតពិនិត្យលក្ខណៈបច្ចេកទេសរថយន្តជាប្រចាំរួមមាន៖ ហ្វ្រាំង ភ្លើងសញ្ញាចរាចរណ៍(ស៊ីញ៉ូ) ភ្លើងបំភ្លឺផ្លូវ និងសំបកកង់ជាដើម និងសូមចូលរួមទប់ស្កាត់កុំឱ្យមានអ្នកបើកបររថយន្តដឹកជញ្ជូនកម្មករនិយោជិតថ្មី យករថយន្តប្រភេទដឹកទំនិញមកដឹកជញ្ជូនកម្មករនិយោជិត និងបន្តអំពាវនាវដល់អ្នកបើកបររថយន្តដឹកទំនិញមកកែទៅជារថយន្តដឹកអ្នកដំណើរដើម្បីឱ្យស្របតាមលក្ខណៈបច្ចេកទេស។
ថ្លែងក្នុងពិធីនេះដែរ ឯកឧត្តម ឈិន សេងងួន អភិបាលរង នៃគណៈអភិបាលខេត្តកំពង់ឆ្នាំង បានក្រើនរំលឹកដល់អ្នកបើកបរយានយន្តទាំងអស់ ត្រូវមានក្រមសីលធម៌លើការបើកបរលើដងផ្លូវ និងត្រូវចូលរួមគោរពច្បាប់ចរាចរណ៍ទាំងអស់គ្នា ព្រមទាំងថ្លែងអំណរគុណដល់ ប.ស.ស. និងអង្គភាពពាក់ព័ន្ធនានា ដែលបានសហការរៀបចំកម្មវិធីនេះឡើងដើម្បីឱ្យបងប្អូនកម្មករនិយោជិតទាំងអស់បានយល់ដឹងបន្ថែម។
ក្នុងឱកាសនេះដែរ ឯកឧត្តម ឧត្តមសេនីយ៍ឯក ចេវ ហាក់ អគ្គស្នងការរងនគរបាលជាតិ នៃក្រសួងមហាផ្ទៃ ក៏បានធ្វើការអំពាវនាវដល់កម្មករនិយោជិតទាំងអស់ មេត្តាបង្កើនការប្រុងប្រយ័ត្នឱ្យបានខ្ពស់ក្នុងការធ្វើដំណើរ ទាំងអ្នកធ្វើដំណើរដោយម៉ូតូ និងអ្នកធ្វើដំណើរដោយរថយន្តដឹកកម្មករនិយោជិត ត្រូវគោរពច្បាប់ស្តីពីចរាចរណ៍ផ្លូវគោក ដើម្បីចៀសវាងករណីគ្រោះថ្នាក់ជាយថាហេតុ និងក្រើនរំលឹកផងដែរ ទៅកាន់អ្នកបើកបររថយន្ដដឹកកម្មករនិយោជិតទាំងអស់ ត្រូវមានស្មារតីទទួលខុសត្រូវខ្ពស់ និងយកចិត្តទុកដាក់រាល់ពេលបើកបរ ៕
