ភ្នំពេញ៖ នាព្រឹកថ្ងៃព្រហស្បតិ៍ ៧កើត ខែពិសាខ ឆ្នាំមមី អដ្ឋស័ក ពុទ្ធសករាជ ២៥៦៩ ត្រូវនឹងថ្ងៃទី២៣ ខែមេសា ឆ្នាំ២០២៦ ឯកឧត្តម ឈួរ សុបញ្ញា រដ្ឋលេខាធិការក្រសួងធម្មការ និងសាសនា បានអញ្ជើញចូលរួមក្នុងពិធីបើកវគ្គសង្ឃាភិបាល បណ្ដុះបណ្ដាលមន្ត្រីសង្ឃជំនាន់ទី២ វគ្គ១ ក្រោមព្រះរាជាធិបតីភាពដ៏ខ្ពង់ខ្ពស់របស់ សម្តេចព្រះពោធិវ័ង្ស ណយ ច្រឹក សម្តេចព្រះសង្ឃនាយករងទី១ គណៈមហានិកាយ នៃព្រះរាជាណាចក្រកម្ពុជា និងជាព្រះរាជតំណាងដ៏ខ្ពង់ខ្ពស់របស់ សម្ដេចព្រះមហាសុមេធាធិបតី អំ លីមហេង សម្តេចព្រះសង្ឃនាយក គណៈមហានិកាយ នៃព្រះរាជាណាចក្រកម្ពុជា។
ពិធីនេះត្រូវបានរៀបចំឡើងដោយ គណៈសង្ឃនាយកនៃព្រះរាជាណាចក្រកម្ពុជា ដោយមានការចូលរួមពីមន្ត្រីសង្ឃសាលាគណរាជធានី-ខេត្ត ជាសមណសិក្ខាការីសរុបចំនួន ១១០អង្គ/រូប និងបានប្រារព្ធធ្វើឡើងនៅ វត្តសំរោងអណ្តែត ក្នុងបរិយាកាសអភិរម្យ ពោរពេញដោយសេចក្តីសក្ការៈ និងស្មារតីគោរពព្រះធម៌យ៉ាងជ្រាលជ្រៅ។
វគ្គសង្ឃាភិបាលនេះ ត្រូវបានបង្កើតឡើងដោយមានគោលបំណងច្បាស់លាស់ ក្នុងការពង្រឹងសមត្ថភាពវិជ្ជាជីវៈ និងលើកកម្ពស់ប្រសិទ្ធភាពការងាររបស់មន្ត្រីសង្ឃ ដោយផ្តោតលើជំនាញដឹកនាំ ការគ្រប់គ្រងរដ្ឋបាលសង្ឃ ការអភិវឌ្ឍធនធានមនុស្សក្នុងស្ថាប័នសាសនា និងការអនុវត្តតួនាទីដោយស្មារតីទទួលខុសត្រូវខ្ពស់។ លើសពីនេះ វគ្គបណ្តុះបណ្តាលនេះក៏ជាការបណ្តុះបណ្តាលផ្នែកសីលធម៌ ព្រះធម៌ និងវិន័យសង្ឃ ដើម្បីធានាថាមន្ត្រីសង្ឃមានទាំងចំណេះដឹង និងគុណធម៌សមស្របក្នុងការដឹកនាំសាសនកិច្ច។ វត្តមានរបស់សមណសិក្ខាការីទាំងនេះ បង្ហាញពីការយកចិត្តទុកដាក់ខ្ពស់ក្នុងការកែលម្អសមត្ថភាព និងការប្តេជ្ញាចិត្តក្នុងការបម្រើព្រះពុទ្ធសាសនា។
ក្នុងឱកាសដ៏មានអត្ថន័យនេះ សម្តេចបានផ្តល់ព្រះរាជអង្កាដ៏មានតម្លៃ ដោយលើកទឹកចិត្តឱ្យមន្ត្រីសង្ឃទាំងអស់ ខិតខំសិក្សា យកចិត្តទុកដាក់លើការអនុវត្តវិន័យ និងគោរពតាមគន្លងព្រះធម៌ ដើម្បីធ្វើជាគំរូល្អសម្រាប់ពុទ្ធបរិស័ទ។
ព្រះអង្គក៏បានសង្កត់ធ្ងន់លើសារៈសំខាន់នៃការរួមចំណែករបស់មន្ត្រីសង្ឃ ក្នុងការរក្សាសាមគ្គីភាពសង្ឃ ការពង្រឹងវប្បធម៌សាសនា និងការចូលរួមអភិវឌ្ឍសង្គមជាតិ។ ជាសារសំខាន់ វគ្គសង្ឃាភិបាលបណ្ដុះបណ្ដាលនេះ គឺជាវេទិកាដ៏មានតម្លៃសម្រាប់ការចែករំលែកបទពិសោធន៍ ការពង្រឹងសមត្ថភាព និងការបង្កើនភាពរួបរួមក្នុងចំណោមមន្ត្រីសង្ឃទូទាំងប្រទេស។ វាជាជំហានសំខាន់មួយក្នុងការបន្តអភិវឌ្ឍស្ថាប័នសង្ឃ ឱ្យមានសមត្ថភាព ប្រសិទ្ធភាព និងសេចក្តីថ្លៃថ្នូរដែលអាចឆ្លើយតបទៅនឹងតម្រូវការរបស់សង្គមសម័យថ្មី ៕
