កំពង់ស្ពឺ៖ ដោយមានការចង្អុលបង្ហាញណែនាំពី ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស និងមានការណែនាំដោយផ្ទាល់សំណាក់ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ នាព្រឹកថ្ងៃទី១៥ ខែមករា ឆ្នាំ២០២៦ នាវេលាម៉ោង ៨:០០នាទីព្រឹក លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺបានចាត់លោកវរសេនីយ៍ឯក ភូ ឌីសាឌីន មេបញ្ជាការរង ជាតំណាង បានអញ្ជើញដឹកនាំប្រតិភូ កងរាជអាវុធហត្ថខេត្តកំពង់ស្ពឺ ចូលរួមគោរពវិញ្ញាណក្ខន្ធសព ឯកឧត្តម ឧត្តមសេនីយ៍ទោ កាន់ ណាំង ទីប្រឹក្សាក្រសួងការពារជាតិ និងជាអតីតមេបញ្ជាការរង យោធភូមិភាគទី៣ នៅគេហដ្ឋាននៃសពដែលកំពុងធ្វើបុណ្យតាមប្រពៃណី ស្ថិតនៅក្នុងភូមិបឹងឃុនឆាង សង្កាត់ស្មាច់មានជ័យ ក្រុងខេមរៈភូមិន្ទ ខេត្តកោះកុង។
មរណភាពរបស់ ឯកឧត្តម ឧត្តមសេនីយ៍ទោ កាន់ ណាំង គឺជាការបាត់បង់នូវ ឪពុក ជីតា និងញាតិមិត្តដ៏ឧត្ដុង្គឧត្តម ប្រកបទៅ ដោយព្រហ្មវិហារធម៌ និងការសណ្ដោសប្រណី គួរជាទីគោរពស្រឡាញ់ដ៏ជ្រាលជ្រៅរបស់កូនចៅ-ញាតិមិត្ត ព្រមទាំងក្រុមគ្រួសារទាំងមូល ហើយក៏ជាការបាត់បង់នូវ វីរៈជនស្នេហាជាតិ ដែលបានរួមចំណែកលើកិច្ចការងារការពារជាតិ នាពេលកន្លងមក។
ស្ថិតក្នុងសមានទុក្ខ វិយោគសោកស្តាយ ស្រណោះអាឡោះអាល័យជាពន់ពេក ដ៏សែនក្រៀមសោកសៅនេះផងដែរ លោកវរសេនីយ៍ឯក ភូ ឌីសាឌីន រួមនិងប្រតិភូកងរាជអាវុធហត្ថខេត្តកំពង់ស្ពឺ បានពាំនាំនូវការផ្តាំផ្ញើរសួរសុខទុក្ខ និងចូលរួមរំលែកទុក្ខដ៏ក្រៀមក្រំមួយនេះ ពីសំណាក់លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ ចំពោះគ្រួសារសពរបស់ឯកឧត្តម ឧត្តមសេនីយ៍ទោ កាន់ ណាំង ព្រមទាំងសម្តែងនូវសេចក្តីសង្វេកយ៉ាងជ្រាលជ្រៅ និងសូមឧទ្ទិសបួងសួងដល់ដួងវិញ្ញាណ ឯកឧត្តម ឧត្តមសេនីយ៍ទោ កាន់ ណាំង សូមបានទៅកាន់ឋានបរមសុខក្នុងសុគតិភព កុំបីឃ្លាងឃ្លាតឡើយ ៕
