កំពង់ស្ពឺ៖ ដោយមានការចង្អុលបង្ហាញណែនាំពី ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាវុធហត្ថខេត្តកំពង់ស្ពឺ នារសៀលថ្ងៃទី២៩ ខែធ្នូ ឆ្នាំ២០២៥ បានចាត់ឲ្យ លោកវរសេនីយ៍ឯក ភូឌី សាឌីន ជាតំណាង អញ្ជើញដឹកនាំប្រតិភូកងរាជអាវុធហត្ថខេត្តកំពង់ស្ពឺ អមតំណើរឯកឧត្តម បណ្ឌិត ជាម ចន្ទ័សោភ័ណ្ឌ អភិបាល នៃគណៈអភិបាលខេត្តកំពង់ស្ពឺ ចូលរួមគោរពវិញ្ញាណក្ខន្ធវីរៈកងទ័ព លោកវរសេនីយ៍ត្រី សួន អាន ជន្មាយុ៤៨ឆ្នាំ ដែលបានពលីជីវិតនៅសមរភូមិមុខតំបន់តាថាវ ខេត្តព្រះវិហារ អង្គភាពកងពលតូចអន្តរាគមន៍លេខ១ ដើម្បីបុព្វហេតុជាតិ និងមាតុភូមិកម្ពុជា។
ពិធីបុណ្យបូជាសពវីរកងទ័ព លោកវរសេនីយ៍ត្រី សួន អាន បានពលីជីវិតនៅសមរភូមិមុខ ដើម្បីបុព្វហេតុជាតិ និងមាតុភូមិកម្ពុជា ឈរជើងនៅសមរភូមិតំបន់តាថាវ ខេត្តព្រះវិហារ អង្គភាពកងពលតូចអន្តរាគមន៍លេខ១ បានរៀបចំធ្វើឡើងនៅគេហដ្ឋានភូមិទេពភិរម្យ ឃុំវាលពន់ ស្រុកថ្ពង ខេត្តកំពង់ស្ពឺ។
នាពេលដ៏សែនក្រៀមក្រំសោកសៅនេះផងដែរ លោកវរសេនីយ៍ឯក ភូឌី សាឌីន រួមនិងប្រតិភូកងរាជអាវុធហត្ថខេត្តកំពង់ស្ពឺ ក៏បានពាំនាំនូវការផ្តាំផ្ញើសួរសុខទុក្ខនិងការចូលរួមរំលែកទុក្ខដ៏ក្រៀមក្រំមួយនេះ ពីសំណាក់ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ ចំពោះគ្រួសារសពវីរៈកងទ័ព លោកវរសេនីយ៍ត្រី សួន អាន ដែលបានពលីជីវិតនៅសមរភូមិមុខ ក្នុងពេលបំបេញបេសកម្មដ៏ឧត្តុង្គឧត្តម ដើម្បីការពារដែនអធិបតេយ្យភាព និងបូរណភាពទឹកដីពីសត្រូវឈ្លានពានថៃ នេះគឺជាការលះបង់ដ៏ធំធេងរបស់គាត់ ដែលបានបូជាជីវិតដើម្បីជាតិមាតុភូមិ និងដើម្បីបុព្វហេតុថែរក្សាសុខសន្តិភាពជូនប្រជាជនកម្ពុជា។
ក្នុងនាមថ្នាក់ដឹកនាំ នាយទាហាន នាយទាហានរង នៃបញ្ជាការកងរាជអាវុធហត្ថខេត្តកំពង់ស្ពឺទាំងអស់ សូមគោរពដឹងគុណ និងថ្លែងអំណរគុណដល់វីរកងទ័ព ដ៏អង់អាចក្លាហានទាំងអស់ដែលបានលះបង់អស់កម្លាំងកាយចិត្ត ទាំងអាយុជីវិតការពារទឹកដីយើង។ យើងនឹងចងចាំនូវវីរភាពនេះគ្មានថ្ងៃបំភ្លេចឡើយ ជាពិសេសសូមឧទ្ទិសបួងសួងដល់ដួងវិញ្ញាណ វីរៈកងទ័ពលោកវរសេនីយ៍ត្រី សួន អាន សូមបានទៅកាន់ឋានបរមសុខក្នុងសុគតិភព កុំបីឃ្លាងឃ្លាតឡើយ ៕
