ភ្នំពេញ៖ នាថ្ងៃសៅរ៍ ១០រោច ខែកត្តិក ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៥ ខែវិច្ឆិកា ឆ្នាំ២០២៥ ក្រុមការងាររាជរដ្ឋាភិបាលចុះជួយសង្កាត់បឹងកក់ទី២ បានសហការជាមួយរដ្ឋបាលសង្កាត់បឹងកក់ទី២ បានរៀបចំកម្មវិធីឧបត្ថម្ភដល់សិស្សានុសិស្សកំពុងសិក្សានៅសាលាបឋមសិក្សាវត្តនាគវ័ន ពីថ្នាក់មត្តេយ្យដល់ថ្នាក់ទី៦ សរុប៤៨៣នាក់ ក្រោមអធិបតីភាព លោកជំទាវ យ៉ិនទៀង ពុទ្ធិរស្មី តំណាងដ៏ខ្ពង់ខ្ពស់របស់ កិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្រ្តី និងលោកជំទាវ ឡុង វិសាខា, ឯកឧត្តម ទ្រី តាយ ប្រធានក្រុមការងារចុះជួយសង្កាត់បឹងកក់ទី២, ឯកឧត្តម ស សេរីវិចិត្រ អនុប្រធានក្រុមការងារចុះជួយសង្កាត់បឹងកក់ទី២, ឯកឧត្ដម បុឹល ច័ន្ទវីរៈ អនុប្រធានក្រុមការងារចុះជួយសង្កាត់បឹងកក់ទី២, លោក វ៉ាន់ សារ៉េត ចៅសង្កាត់បឹងកក់ទី២, លោក ហ៊ី សាវុធ នាយកសាលាបឋមសិក្សាវត្តនាគវ័ន ព្រមទាំងសហការីក្រុមការងារចុះជួយសង្កាត់បឹងកក់ទី២, សមាជិកក្រុមប្រឹក្សាសង្កាត់បឹងកក់ទី២, លោកគ្រូ អ្នកគ្រូ, យុវជនសង្កាត់ និងអាណាព្យាបាលសិស្ស។
ឆ្លៀតក្នុងឱកាសនេះ លោកជំទាវ យ៉ិនទៀង ពុទ្ធិរស្មី មានកិត្តិយសបាននាំយកនូវការសួរសុខទុក្ខ ព្រមទាំងអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុនី នូវសៀវភៅមានរូបសម្តេច និងអំណោយដ៏ថ្លៃថ្លារបស់ កិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្រ្តី និងលោកជំទាវ ឡុង វិសាខា បានឧបត្តម្ភដល់លោកគ្រូ អ្នកគ្រូ សរុបចំនួន ២០នាក់ ដោយក្នុង ១នាក់ ទទួលបានថវិកាចំនួន២ម៉ឺនរៀល និងសម្រាប់សិស្សានុសិស្ស ចំនួន ៤៨៣នាក់ នូវសម្ភារៈសិក្សា រួមមាន ប៊ិច, ខ្មៅដៃ, បន្ទាត់, ជ័រលុប, ក្តារឈ្នួន និងដែកខួង និងអាហារសំរ៉ន់ (នំប៉ាវ និងទឹកសុទ្ធ)។
ជាចុងក្រោយ លោកជំទាវ យ៉ិនទៀង ពុទ្ធិរស្មី និងឯកឧត្ដម ស សិរីវិចិត្រ បានឧបត្តម្ភសិស្សពូកែ និងឆ្នើមជាងគេ ចំនួន ៤នាក់ ដោយក្នុង ១នាក់ទទួលបានទូរស័ព្ទដៃ ១គ្រឿង, សំភារៈបំពាក់លើទូរស័ព្ទ ១ឈុត និងថវិកា ៥ម៉ឺនរៀលផងដែរ ៕
