ភ្នំពេញ៖ នារសៀលថ្ងៃទី១៤ ខែវិច្ឆិកា ឆ្នាំ២០២៥នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាង ឯកឧត្តម ម៉េង ហុងប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញជាអធិបតីបិទវគ្គបណ្ដុះបណ្ដាលស្ដីពី "ពិធីការ បដិសណ្ឋារកិច្ច ការប្រើប្រាស់ប្រព័ន្ធធនធានមនុស្ស និងសុវត្ថិភាពបច្ចេកវិទ្យាព័ត៌មាន" ដោយមានការចូលរួមពីសិក្ខាកាមសរុបប្រមាណ ៩០រូប ដែលជាថ្នាក់ដឹកនាំមន្ត្រីរាជការ និងបុគ្គលិករបស់ ប.ស.ស. មកពីសាខាខេត្ត នាយកដ្ឋាន/អង្គភាពពាក់ព័ន្ធ នៅទីស្នាក់ការកណ្ដាល ប.ស.ស.។
ក្នុងឱកាសបិទវគ្គបណ្ដុះបណ្តាលនេះ ឯកឧត្តមបណ្ឌិតអគ្គនាយករង បានថ្លែងអំណរគុណចំពោះការចែករំលែកចំណេះដឹង បទពិសោធន៍របស់គ្រូឧទ្ទេស ដែលបានបណ្ដុះបណ្ដាលផ្នែកពិធីការ បដិសណ្ឋារកិច្ច ការប្រើប្រាស់ប្រព័ន្ធធនធានមនុស្ស និងសុវត្ថិភាពបច្ចេកវិទ្យាព័ត៌មានជាផ្នែកដ៏សំខាន់ក្នុងការជួយលើកកម្ពស់កិត្តិយសរបស់ស្ថាប័នក្នុងការទំនាក់ទំនងជាមួយស្ថាប័នជាតិ និងអន្ដរជាតិ និងសម្រាប់ជំរុញប្រសិទ្ធភាពការងាររបស់ស្ថាប័ន ព្រមទាំងការការពារប្រព័ន្ធរបស់ ប.ស.ស. ឱ្យមានភាពរឹងមាំដើម្បីឆ្លើយតបទៅនឹងយុគសម័យឌីជីថលនាពេលបច្ចុប្បន្ននេះផងដែរ។
ឯកឧត្តមបណ្ឌិតអគ្គនាយករង សង្ឃឹមយ៉ាងមុតមាំថា តាមរយៈការឆ្លងកាត់វគ្គបណ្ដុះបណ្ដាលរយៈពេល៣ថ្ងៃ ចាប់ពីថ្ងៃទី១២-១៤ ខែវិច្ឆិកា ឆ្នាំ២០២៥នេះ សិក្ខាកាមទាំងអស់នឹងយកចំណេះដឹង បទពិសោធន៍ដែលទទួលបានពីវគ្គបណ្ដុះបណ្ដាលនេះ ទៅអនុវត្តការងារប្រចាំថ្ងៃឱ្យមានប្រសិទ្ធភាពខ្ពស់ ដើម្បីរួមចំណែកលើកកម្ពស់ដល់ការងារពិធីការ និងការផ្ដល់សេវាសាធារណៈ របស់ ប.ស.ស. កាន់តែរីកចម្រើនថែមទៀត ៕
