បន្ទាយមានជ័យ៖ នាថ្ងៃទី១៤ ខែវិច្ឆិកា ឆ្នាំ ២០២៥ ឯកឧត្តម អ៊ូច ភា រដ្ឋលេខាធិការក្រសួងមហាផ្ទៃ បានដឹកនាំក្រុមការងារអចិន្ត្រៃយ៍ ដើម្បីសម្របសម្រួលការរៀបចំទីតាំងសុវត្ថិភាព ជម្រកស្នាក់នៅបណ្តោះអាសន្ន ការដឹកជញ្ជូន ការដោះស្រាយសេវាសាធារណៈសុខាភិបាល និងសន្តិសុខ សណ្តាប់ធ្នាប់សាធារណៈជូនប្រជាពលរដ្ឋភៀសសឹក អមដំណើរដោយ ឯកឧត្ដម អ៊ុំ រាត្រី អភិបាល នៃគណៈអភិបាលខេត្ត អញ្ជើញចុះពិនិត្យ និងសំណេះសំណាលជាមួយបងប្អូនជនភៀសសឹក មកពីភូមិព្រៃចាន់ និងភូមិជោគជ័យ មកតាំងទីសុវត្ថិភាព នៅវត្តចាន់ស៊ី ស្រុកអូរជ្រៅ ខេត្តបន្ទាយមានជ័យ។
នាឱកាសនោះ ឯកឧត្តម អ៊ូច ភា ក៏បានថ្លែងអំណរគុណឯកឧត្តម អ៊ុំ រាត្រី អភិបាល នៃគណៈអភិបាលខេត្ត ក៏ដូចជាថ្នាក់ដឹកនាំ ដែលតែងតែយកចិត្តទុកដាក់នៅជាមួយនឹងប្រជាពលរដ្ឋគ្រប់កាលៈទេសៈ។
ជាមួយគ្នានោះ ឯកឧត្តមរដ្ឋលេខាធិការ ក៏បានជំរុញទៅដល់អាជ្ញាធរខេត្ត ស្រុក ក៏ដូចជាក្រុមការងារ ដែលទទួលបងប្អូនជនភៀសសឹក សំដៅធ្វើយ៉ាងណាការពារសន្តិសុខសុវត្ថិភាពជូនពួកគាត់ឱ្យបានល្អទាំងយប់ទាំងថ្ងៃ។ ត្រូវរៀបចំឱ្យតីតាំងឱ្យបានស្អាតត្រឹមត្រូវ បាញ់ថ្នាក់សម្លាប់មូស នៅបរិវេណជុំវិញ។ ហើយ ឯកឧត្តមរដ្ឋលេខាធិការ ក៏បានណែនាំទៅដល់បងប្អូនជនភៀសសឹក ត្រូវឱ្យមានអនាម័យក្នុងការរស់នៅ ដោយត្រូវប្រកាន់ភ្ជាប់ការហូបស្អាត ផឹកស្អាត និងរស់នៅស្អាត។
សូមបញ្ជាក់ថា កាលពីថ្ងៃទី១២ ខែវិច្ឆិកា ឆ្នាំ២០២៥ នៅវេលាម៉ោង១៥.៥០នាទី កម្លាំងទាហានថៃបានប្រើកាំភ្លើង បាញ់ប្រហារមកលើប្រជាពលរដ្ឋកម្ពុជាដែលកំពុងស្នាក់នៅក្នុងជម្រកកៅស៊ូតង់ក្នុងដែនអធិបតេយ្យ នៃព្រះរាជាណាចក្រកម្ពុជា ស្ថិតក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បណ្តាលឱ្យ ប្រជាពលរដ្ឋខ្មែរស្លាប់ចំនួន ១នាក់ និងរងរបួស ៣នាក់ ៕
