ភ្នំពេញ៖ ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងថា គិតចាប់តាំងពីឆ្នាំ១៩៩០ មកដល់ខែកញ្ញា ឆ្នាំ២០២៥នេះ មានយានយន្តបានចុះបញ្ជីសរុបទូទាំងប្រទេសសរុប ៧.៩៦៣.០១៩គ្រឿង ក្នុងនោះម៉ូតូ ៦.៧៥១.៥០៨គ្រឿង យានយន្តធុនស្រាល ៩០៤.១៩៦គ្រឿង និងយានយន្តធុនធ្ងន់ ៣០៧.៣១៥គ្រឿង។
ឯកឧត្តម ផន រឹម បានឱ្យដឹងទៀតថា ក្នុងនោះសម្រាប់រយៈពេល ៩ខែ ឆ្នាំ២០២៥នេះ មានយានយន្តបានចុះបញ្ជីសរុប ៣៧៦.៥០៧គ្រឿង ក្នុងនោះមានម៉ូតូ ៣០៧.៨១៤គ្រឿង រថយន្តធន់ស្រាល ៦១.៦៣១គ្រឿង និងរថយន្តធន់ធ្ងន់ ៧.០៦២គ្រឿង។
អ្នកនាំពាក្យរូបនេះ បានបញ្ជាក់ថា កត្តាដែលមានយានយន្តបានចុះបញ្ជីកើនឡើងជាបន្តបន្ទាប់នេះ ដោយសារការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឱ្យប្រជាពលរដ្ឋមានជីវភាពរីកចម្រើន ធូរធារ និងមានលទ្ធភាពក្នុងការទិញយានយន្តធ្វើដំណើរបានកាន់តែច្រើនឡើងផងដែរ ៕
