សៀមរាប៖ កាលពីព្រឹកថ្ងៃទី២៦ ខែតុលា ឆ្នាំ២០២៥ ឯកឧត្តមបណ្ឌិត ហេង សុផាន់ណារិទ្ធ អគ្គនាយករងប.ស.ស. តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ បានផ្តល់កិត្តិយសអញ្ជើញជាអធិបតីបើកទិវាអន្តរជាតិស្រ្តីជនបទ គាំពារសង្គមដើម្បីអន្តរកាលយុត្តិធម៌ និងសកម្មភាពបរិស្ថាននៅកម្ពុជា។
មានប្រសាសន៍ក្នុងពិធីបើកទិវាអន្តរជាតិស្រ្តីជនបទនេះ ឯកឧត្តមបណ្ឌិតបានថ្លែងថា ស្រ្តីត្រូវបានទទួលស្គាល់ថា មានតួនាទីដ៏សំខាន់ ក្នុងការរួមចំណែកលើកកម្ពស់វិស័យកសិកម្ម និងអភិវឌ្ឍន៍ជនបទ ក្រោមរូបភាពកែលម្អសន្តិសុខស្បៀង លុបបំបាត់ភាពក្រីក្រនៅតាមជនបទ ពង្រឹងភាពអង់អាច និងភាពជាអ្នកដឹកនាំរបស់ស្ត្រីតាមជនបទនៅកម្ពុជា។ លើសពីនេះ ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ បានរួមចំណែកយ៉ាងសំខាន់ក្នុងការផ្តល់អត្ថប្រយោជន៍របបសន្តិសុខសង្គមទៅសមាជិក ដែលជាស្រ្តីដូចជាផ្តល់ជូនប្រាក់ឧបត្ថម្ភរបស់រាជរដ្ឋាភិបាលសម្រាប់សមាជិក ប.ស.ស. ជាស្ត្រីមានផ្ទៃពោះ និងកូនអាយុក្រោម២ឆ្នាំ និងប្រាក់បំណាច់ប្រចាំថ្ងៃ៧០% រួមទាំងការផ្តល់ជូនសេវាព្យាបាលដោយឥតគិតថ្លៃនៅតាមមូលដ្ឋានសុខាភិបាលដៃគូ ប.ស.ស. នៅពេលជួបគ្រោះថ្នាក់ និងមានបញ្ហាសុខភាពផងដែរ។
ឯកឧត្តមបណ្ឌិត បានថ្លែងបន្តថា នាពេលកន្លងមក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ និងអង្គការអុកស្វាម (OXFAM) បានសហការរៀបចំវគ្គបណ្តុះបណ្តាល និងវេទិកាសាធារណៈប្រចាំឆ្នាំជាច្រើនលើករួចមកហើយ ដើម្បីចែករំលែកនូវចំណេះដឹង បទពិសោធន៍ និងមតិយោបល់ល្អៗ ក៏ដូចជាដំណោះស្រាយលើបញ្ហាប្រឈមនានា និងបង្កើនការផ្សព្វផ្សាយគោលនយោបាយគាំពារសង្គមឱ្យបានកាន់តែទូលំទូលាយដល់គ្រប់មជ្ឈដ្ឋាន នៅក្នុងប្រទេសកម្ពុជា។
សូមបញ្ជាក់ថា៖ ទិវាខាងលើប្រព្រឹត្តទៅនៅសណ្ឋាគារសុខាអង្គរ ខេត្តសៀមរាប ដោយមានវត្តមានអញ្ជើញចូលរួមពីថ្នាក់ដឹកនាំ និងមន្ត្រីជំនាញនៃ ប.ស.ស. តំណាងអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) នៃក្រសួងការងារ និងបណ្ដុះបណ្ដាលវិជ្ជាជីវៈ រដ្ឋបាលខេត្តសៀមរាប អគ្គលេខាធិការដ្ឋានក្រុមប្រឹក្សាជាតិគាំពារសង្គម មូលនិធិជាតិជំនួយសង្គម អង្គការអុកស្វាមអុកស្វាម (OXFAM) និងតំណាងក្រសួង ស្ថាប័នជាតិ-អន្តរជាតិ សរុបប្រមាណជាង ៣៥០រូប ៕
