ភ្នំពេញ៖ ដើម្បីបង្កើនប្រសិទ្ធភាពខ្ពស់ក្នុងការផ្តល់សេវាសុខាភិបាលជូនប្រជាពលរដ្ឋ ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល បានជំរុញ និងលើកទឹកចិត្តដល់គ្រូពេទ្យទាំងរដ្ឋ និងឯកជនទាំងអស់ ត្រូវបន្តខិតខំយកចិត្តទុកដាក់លើការបំរើផ្តល់ជូនសេវាព្យាបាល និងសេវាថែទាំសុខភាពជូនប្រជាពលរដ្ឋឱ្យបានល្អប្រសើរតាមស្តង់ដារអតិបរមា ពិសេសត្រូវខិតខំផ្សព្វផ្សាយពន្យល់ណែនាំប្រជាពលរដ្ឋ ឱ្យបានទូលំទូលាយ ក្នុងការអញ្ជើញមកពិនិត្យសុខភាព ដើម្បីដឹងពីស្ថានភាពសុខភាពរបស់ខ្លួនជាមុន កុំចាំដល់ពេលឈឺ សំដៅមានវិធានការបង្ការទប់ស្កាត់ជំងឺផ្សេងៗបានទាន់ពេលវេលា។
ឯកឧត្តមអភិបាលខេត្តកណ្ដាល បានជំរុញដូច្នេះ នៅក្នុងកិច្ចប្រជុំពង្រឹងបន្ថែមលើការងារគ្រប់គ្រងសេវាសុខាភិបាលឯកជន ក្នុងភូមិសាស្ត្រខេត្តកណ្តាល នៅរសៀលថ្ងៃទី១៦ ខែកញ្ញា ឆ្នាំ២០២៥ ដោយមានការចូលរួមពីអាជ្ញាធរក្រុង-ស្រុកទាំង១៣ មន្ទីរអង្គភាពពាក់ព័ន្ធ និងគ្លីនិកឯកជនក្នុងខេត្តផងដែរ។
ឯកឧត្តមអភិបាលខេត្ត បានស្នើដល់គ្រូពេទ្យទាំងអស់ត្រូវបង្កើនការសិក្សាស្រាវជ្រាវជានិច្ច និងត្រូវបន្តការស្វែងយល់រៀនសូត្រអំពីចំណេះដឹងថ្មីៗបន្ថែមទៀត ដើម្បីពង្រឹងវិស័យសុខាភិបាលឱ្យបាន កាន់តែល្អប្រសើរ ជួយរួមចំណែកការពារសុខភាពសាធារណៈ និងជួយសង្គ្រោះប្រជាពលរដ្ឋបានកាន់តែច្រើន ទទួលបានការជឿជាក់ពីប្រជាពលរដ្ឋ ជាពិសេសជួយដល់សេដ្ឋកិច្ចសង្គមរបស់យើងបានកាន់តែរឹងមាំដោយខ្លួនឯង កាត់បន្ថយការចំណាយលុយទៅថែទាំសុខភាពនៅក្រៅស្រុក។
នាឱកាសនោះដែរ ឯកឧត្តមអភិបាលខេត្ត បានធ្វើការជំរុញ និងលើកទឹកចិត្តដល់មណ្ឌលសុខភាព និងគ្លីនិកឯកជន ត្រូវស្វែងយល់ឱ្យបានច្បាស់អំពីសូចនាករទាំង៨ ដែលបានកំណត់ក្នុងការប្រកួតប្រជែងអង្គភាពផ្តល់សេវាសាធារណៈគំរូថ្នាក់ខេត្ត ក្នុងវិស័យសុខាភិបាល រឿងដែលសំខាន់នោះគឺត្រូវយកសូចនាករទាំងនោះមកតម្រង់ទិសក្នុងការកែលម្អ ការគ្រប់គ្រង និងការផ្តល់សេវា ត្រូវយកចំណុចទាំងនោះមកអនុវត្តជាសកម្មភាពជាក់ស្ដែងក្នុងអង្គភាពរបស់ខ្លួន សំដៅរួមគ្នាធ្វើយ៉ាងណាខិតខំផ្ដល់សេវាសុខាភិបាលជូនប្រជាពលរដ្ឋឱ្យកាន់តែមានប្រសិទ្ធភាពខ្ពស់ ស្របទៅតាមស្តង់ដាដែលបានកំណត់។
ឯកឧត្តមអភិបាលខេត្ត បានបញ្ជាក់ថា ការពង្រឹងលើវិស័យសុខាភិបាលគឺជាគោលនយោបាយអាទិភាពរបស់រាជរដ្ឋាភិបាលដែលកំពុងតែយកចិត្តទុកដាក់ខ្ពស់ ហើយដើម្បីសម្រេចនូវគោលដៅនេះរាជរដ្ឋាភិបាលបានខិតខំធ្វើកិច្ចការងារយ៉ាងច្រើន ព្រមទាំងបានដាក់ចេញនូវកម្មវិធីជាច្រើនសម្រាប់ការអនុវត្ត ជាពិសេស គោលនយោបាយគាំពារសង្គម គឺការឧបត្ថម្ភសាច់ប្រាក់ជូនដល់ស្ត្រីមានផ្ទៃពោះដែលស្ថិតក្នុងគ្រួសារក្រីក្រមានប័ណ្ណសមធម៌សង្គម ទាំងអំឡុងពេលមានផ្ទៃពោះ ពេលសម្រាល ហើយក៏មានថវិកាសម្រាប់ទារករហូតដល់មានអាយុ ២ឆ្នាំ ដើម្បីជម្រុញការលូតលាស់ទំាងកាយសម្បទា និងបញ្ញាស្មារតី។
លោក គួយ ប៊ុនធឿន ប្រធានមន្ទីរសុខសុខាភិបាល នៃរដ្ឋបាលខេត្តកណ្ដាល បានឱ្យដឹងថា ក្នុងខេត្តកណ្ដាលមានសេវាសុខាភិបាលឯកជនចំនួន ១.៩៥៩កន្លែង ក្នុងរយៈពេល ៨ខែកន្លងមកនេះក្រុមការងារមន្ទីរសុខាភិបាលខេត្ត បានធ្វើការចុះត្រួតពិនិត្យ និងកែលម្អស្ថានភាពនៅតាមមន្ទីរពេទ្យឯកជន មន្ទីរពហុព្យាបាលមន្ទីរសម្រាកព្យាបាល មន្ទីរពិសោធន៍វេជ្ជសាស្ត្រនិងមន្ទីរព្យាបាលមាត់ធ្មេញបានចំនួន ៤៥ទីតាំង ព្រមទាំងបានផ្ដល់នូវអនុសាសន៍កែលម្អរាល់ចំណុចខ្វះខាតមួយចំនួនផងដែរ ដើម្បីចូលរួមចំណែកដល់ការពង្រឹងនូវគុណភាព និងស័ក្កសិទ្ធភាពចំពោះសេវាសុខាភិបាលក្នុងខេត្តកណ្ដាលឱ្យកាន់តែល្អប្រសើរថែមទៀត ៕
