ភ្នំពេញ៖ នារសៀលថ្ងៃទី១ ខែកញ្ញា ឆ្នាំ២០២៥នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. និងជាប្រធានក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក) តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានចូលរួមប្រជុំពិភាក្សា ជាមួយអគ្គលេខាធិការដ្ឋាននៃគណៈកម្មាធិការជាតិសុវត្ថិភាពចរាចរណ៍ផ្លូវគោក ដោយពិភាក្សាលើរបៀបវារៈសំខាន់ៗចំនួន ៤រួមមាន៖
១). ពិភាក្សាអំពីយន្តការនៃការជំរុញការកែលម្អរថយន្តដឹកជញ្ជូនកម្មករនិយោជិតឱ្យកាន់តែមានផាសុកភាព និងសុវត្ថិភាពជាងមុន
២). ការពិនិត្យខ្លឹមសារ និងគំរូស្ទីកគ័របិទសម្គាល់រថយន្តដឹកជញ្ជូនកម្មករនិយោជិត
៣). ពិភាក្សាអំពីយន្តការនៃការត្រួតពិនិត្យលក្ខណៈបច្ចេកទេសរថយន្តដឹកជញ្ជូនកម្មករនិយោជិត
៤). ពិភាក្សាអំពីយន្តការនៃការប្រឡងផ្តល់បណ្ណបើកបរដល់អ្នកបើកបររថយន្តដឹកជញ្ជូនកម្មករនិយោជិត។
កិច្ចប្រជុំពិភាក្សាខាងលើ ធ្វើឡើងនៅទីស្ដីការក្រសួងសាធារណការ និងដឹកជញ្ជូន ដែលដឹកនាំដោយ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក និងឯកឧត្តម នាយឧត្តមសេនីយ៍ ហ៊ឹម យ៉ាន រដ្ឋលេខាធិការក្រសួងមហាផ្ទៃ និងជាអគ្គលេខាធិការរង នៃគណៈកម្មាធិការជាតិសុវត្ថិភាពចរាចរណ៍ផ្លូវគោក និងមានការអញ្ជើញចូលរួមពីភាគីពាក់ព័ន្ធប្រមាណជា ២០រូប ៕
