ទីក្រុងលានអ៉ីនកាង៖ ឯកឧត្តម កែវ វណ្ណថន រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានបន្តអញ្ជើញដឹកនាំគណៈប្រតិភូក្រសួងមហាផ្ទៃ ចូលរួមវេទិកាសន្និសីទកិច្ចសហប្រតិបត្តិការសន្តិសុខសាធារណៈសកលឆ្នាំ២០២៥ ក្រោមមូលបទ "រៀបចំសន្តិសុខសាធារណៈសកលរួមគ្នា សកម្មភាពរួមដើម្បីដោះស្រាយការគំរាមកំហែងចម្រុះ-Shaping Global Public Security Together: United Action to Tackle Diverse Threats" នារសៀលថ្ងៃទី១៧ ខែកញ្ញា ឆ្នាំ២០២៥ នៅមជ្ឍមណ្ឌលសន្និសីទHaizhou Bayview ទីក្រុងលានអ៉ីនកាង ខេត្តជាំងស៊ូ ប្រទេសចិន។
វេទិកាសន្និសីទនេះ ត្រូវបានបើកជាផ្លូវការដោយមានការចូលរួមពីឯកឧត្តម Wang Xiaohong សមាជិកក្រុមប្រឹក្សារដ្ឋ និងជារដ្ឋមន្រ្តីក្រសួងសន្តិសុខសាធារណៈចិន ឯកឧត្តម ប្រធានស្ថាប័ននគរបាលអន្តរជាតិ(INTERPOL) ឯកឧត្តម អគ្គលេខាធិការរងនៃអង្គការសហប្រជាជាតិ និងភ្ញៀវកិត្តិយសជាថ្នាក់ដឹកនាំក្រសួង-ស្ថាប័ន និងមន្រ្តីអនុវត្តច្បាប់ចំនួនជាង៨០០នាក់ មកពីបណ្តាប្រទេស អង្គការអន្តរជាតិ និងស្ថាប័នអនុវត្តច្បាប់ចំនួន១១១ ប្រទេស/ស្ថាប័ន។
ជាមួយគ្នានេះ ឯកឧត្តមរដ្ឋលេខាធិការ ក៏បានចូលរួមពិធីតាំងពិពណ៌ឧបករណ៍បច្ចេកវិទ្យាសន្តិសុខសាធារណៈ ដែលមានការតាំងបង្ហាញឧបករណ៍ និងបច្ចេកវិទ្យាទំនើបចុងក្រោយរបស់ក្រុមហ៊ុនចិនជាង៥០ក្រុមហ៊ុន ដែលមានមុខងារសម្រាប់ប្រតិបត្តិការរក្សាសន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គម ៕
