ភ្នំពេញ៖ នារសៀលថ្ងៃទី០៧ ខែសីហា ឆ្នាំ២០២៥ ឯកឧត្តម មាន ចាន់យ៉ាដា អភិបាលនៃគណៈអភិបាលខេត្តឧត្តរមានជ័យ បានអញ្ជើញចុះជួបសំណេះសំណាល និងថ្លែងអំណរគុណជាមួយបងប្អូនមន្ត្រីរាជការ ក្រុមប្រឹក្សាស្រុក ក្រុមប្រឹក្សាឃុំ មេភូមិ កងកម្លាំង និងក្រុមការងារ កំពុងប្រតិបត្តិការជួយប្រជាជនភៀសសឹកនៅក្នុងទីទួលសុវត្ថិភាពឃ្លាំងដំឡូងស្រុកអន្លង់វែង ខេត្តឧត្ដរមានជ័យ។
ក្នុងឱកាសនោះ ឯកឧត្តម មាន ចាន់យ៉ាដា ក៏បានផ្ដាំផ្ញើដល់អាជ្ញាធរទាំងអស់ត្រូវបង្កើនការយកចិត្តទុកដាក់ផ្តល់ព័ត៌មានឲ្យបានឆាប់រហ័សចំពោះសភាពការណ៍ណាមួយដែលមានហានិភ័យចំពោះប្រជាពលរដ្ឋ។
ឯកឧត្តមអភិបាលខេត្ត បានបញ្ជាក់បន្ថែមទៀតផងដែរថា សម្រាប់បងប្អូនប្រជាពលរដ្ឋ ដែលមានទីលំនៅឋានឆ្ងាយពីព្រំដែនអាចធ្វើដំណើរត្រឡប់ទៅកាន់ទីលំនៅឋានវិញដើម្បីមើលទ្រព្យសម្បត្តិនៅក្នុងផ្ទះ ហើយចំពោះករណីមានសភាពការណ៍ហានិភ័យដែលអាចកើតឡើង អាជ្ញាធរថ្នាក់ខេត្ត ក្រុង-ស្រុក ឃុំ-សង្កាត់ មេភូមិ នឹងផ្តល់ព័ត៌មានជូនបងប្អូនជាប្រចាំ ៕
