ភ្នំពេញ៖ ឯកឧត្តម សុខ សូកេន រដ្ឋមន្ត្រីក្រសួងអធិការកិច្ច បានផ្ញើសារលិខិតអបអរសាទរ និងគោរពជូនពរ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា ក្នុងឱកាសដែលសម្តេចកិត្តិសង្គហបណ្ឌិត ត្រូវបានជាប់ឆ្នោតជាប្រធានក្រុមប្រឹក្សាជាតិប្រឆាំងអំពើពុករលួយ សម្រាប់អាណត្តិទី៤ (២០២៥-២០៣០) នៅក្នុងកិច្ចប្រជុំលើកទី១ របស់ក្រុមប្រឹក្សាជាតិប្រឆាំងអំពើពុករលួយ។
សារលិខិតរបស់ឯកឧត្តម សុខ សូកេន ផ្ញើជូនសម្តេចកិត្តិសង្គហបណ្ឌិត ម៉ែន សំអន មានខ្លឹមសារដូច្នេះថា៖
តាងនាមថ្នាក់ដឹកនាំ និងមន្ត្រីរាជការនៃក្រសួងអធិការកិច្ច និងក្នុងនាមខ្លួនខ្ញុំបាទផ្ទាល់ និងភរិយា សូមសម្តែងនូវអំណរសាទរយ៉ាងក្រៃលែងប្រកបដោយក្តីមោទកភាពបំផុតក្នុងឱកាសដែល សម្តេចកិត្តិសង្គហបណ្ឌិត ត្រូវបានជាប់ឆ្នោតជាប្រធានក្រុមប្រឹក្សាជាតិប្រឆាំងអំពើពុករលួយ សម្រាប់អាណត្តិទី៤ (២០២៥-២០៣០) នៅក្នុងកិច្ចប្រជុំលើកទី១ របស់ក្រុមប្រឹក្សាជាតិប្រឆាំងអំពើពុករលួយ ថ្ងៃទី១៩ ខែសីហា ឆ្នាំ២០២៥។ ការទទួលបានមុខតំណែងដ៏ឧត្តុង្គឧត្តមនេះ គឺពិតជាស័ក្តិសមទៅនឹងសមត្ថភាព ទេពកោសល្យ បទពិសោធ គុណធម៌ សុជីវធម៌ ភាពជាអ្នកដឹកនាំ និងគុណសម្បត្តិដ៏បវរថ្លៃថ្លារបស់ សម្តេចកិត្តិសង្គហ-បណ្ឌិត ដែលជានិច្ចកាលតែងតែយកអស់កម្លាំងកាយចិត្ត ប្រាជ្ញា និងស្មារតី ក្នុងការចូលរួមដឹកនាំក្រុមប្រឹក្សាជាតិ ប្រឆាំងអំពើពុករលួយទទួលបានលទ្ធផលគួរជាទីមោទនៈ ជូនជាតិមាតុភូមិ និងប្រជាជន នាពេលកន្លងមក។
ឆ្លៀតក្នុងឱកាសដ៏ថ្លៃថ្លានេះ យើងខ្ញុំទាំងអស់គ្នា សូមគោរពជូនពរ សម្តេចកិត្តិសង្គហបណ្ឌិត ទទួលបាននូវជោគជ័យថ្មីៗបន្ថែមទៀតក្នុងការបំពេញបេសកកម្មដ៏ឧត្តុង្គឧត្តម ដើម្បីបុព្វហេតុជាតិ មាតុភូមិ និង សូមបួងសួងដល់គុណបុណ្យព្រះរតនត្រ័យកែវទាំងបី វត្ថុស័ក្តិសិទ្ធិទាំងឡាយក្នុងលោក សូមតាមជួយអភិបាល ប្រោះព្រំសព្ទសាធុការពរគ្រប់ប្រការជូនចំពោះ សម្តេចកិត្តិសង្គហបណ្ឌិត ព្រមទាំងក្រុមគ្រួសារ សូម សមប្រកបនឹងពុទ្ធពរទាំង ៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។
សូម សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងជាប្រធានក្រុមប្រឹក្សាជាតិប្រឆាំងអំពើពុករលួយ មេត្តាទទួលនូវការគោរពដ៏ខ្ពង់ខ្ពស់អំពីយើងខ្ញុំទាំងអស់គ្នា ៕
