ភ្នំពេញ៖ ដើម្បីរួមចំណែកជាមួយរាជរដ្ឋាភិបាលក្នុងការផ្តល់ឱកាសការងារជូនពលករខ្មែរដែលត្រឡប់មកពីប្រទេសថៃ នាព្រឹកថ្ងៃសុក្រ ទី២២ ខែសីហា ឆ្នាំ២០២៥ នៅឃុំតានៃ ស្រុកព្រៃនប់ ខេត្តព្រះសីហនុ ឯកឧត្តមបណ្ឌិត ម៉ុង ឫទ្ធី ប្រធានគណៈកម្មការទី៣ព្រឹទ្ធសភា និងជាប្រធានក្រុមសមាជិកព្រឹទ្ធសភាប្រចាំភូមិភាគទី៧ និងលោកជំទាវ បានអញ្ជើញជួបសំណេះសំណាល សាកសួរសុខទុក្ខបុគ្គលិក កម្មករ និងទទួលស្វាគមន៍ពលករខ្មែរដែលទើបតែវិលត្រឡប់មកពីប្រទេសថៃវិញ បានមកចូលបម្រើការងារនៅក្នុងចំការដូងប្រេង និងកៅស៊ូដែលជាបុត្រសម្ព័ន្ធរបស់ក្រុមហ៊ុនម៉ុងឫទ្ធីគ្រុប ចំនួន ១៤៤នាក់ ស្មើនឹង ៥៧គ្រួសារ។
ក្នុងពិធីសំណេះសំណាលនេះមានការចូលរួមពី ថ្នាក់ដឹកនាំក្រុមហ៊ុនម៉ុង ឫទ្ធី គ្រុប, តំណាងក្រសួងការងារ និងបណ្ដុះបណ្តាលវិជ្ជាជីវៈ, អាជ្ញាធរឃុំតានៃ បុគ្គលិក កម្មករចំការដូងប្រេង និងពលករសរុបប្រមាណ ៣៥០នាក់។
ឆ្លៀតក្នុងឱកាសនោះ ឯកឧត្តមបណ្ឌិត ម៉ុង ឫទ្ធី បានឧបត្ថម្ភដល់គ្រួសារពលករក្នុងមួយគ្រួសារទទួលបាននូវ៖ អង្ករ ១បាវ ស្មើនឹង ៥០គីឡូក្រាម, ទឹកត្រី ១យួរ, ទឹកស៊ីអ៊ីវ ១យួរ, សាច់ជ្រូក ៣គីឡូក្រាម, មី ១កេស, ស្ករស ២គីឡូក្រាម និងថវិកាចំនួន ១០០,០០០រៀល និងកម្មករចាស់មកចូលរួមចំនួន ១៨៣នាក់ ក្នុងម្នាក់ៗទទួលបានថវិកា ៥០,០០០រៀល និងស្ករស ២គីឡូក្រាម សរុបថវិកាចំណាយផ្ទាល់ខ្លួនរបស់ឯកឧត្តមទាំងអស់ចំនួន ៣២,៦០២,០០០រៀល ៕
