ភ្នំពេញ៖ នារសៀលថ្ងៃទី០២ ខែសីហា ឆ្នាំ២០២៥នេះ ឯកឧត្តមបណ្ឌិត ជ្រុន ថេរ៉ាវ៉ាត សមាជិកគណៈកម្មាធិការកណ្តាល អនុប្រធានយុវជនគណបក្សថ្នាក់កណ្តាល និងជាប្រធានគណៈប្រចាំការ នៃគណៈអចិន្រ្តៃយ៍យុវជនគណបក្សថ្នាក់កណ្តាល តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត អនុប្រធានគណបក្ស និងជាប្រធានយុវជនគណបក្សថ្នាក់កណ្តាល បានដឹកនាំប្រតិភូយុវជនគណបក្សថ្នាក់កណ្តាល អញ្ជើញចុះសួរសុខទុក្ខនាយទាហានដែលកំពុងសម្រាកព្យាបាលរបួស នៅមន្ទីរពេទ្យយោធភូមិភាគទី៤ និងមន្ទីរពេទ្យខេត្តសៀមរាប។
ក្នុងឱកាសនោះ ឯកឧត្តមបណ្ឌិត ជ្រុន ថេរ៉ាវ៉ាត បានពាំនាំនូវការផ្តាំផ្ញើសាកសួរសុខទុក្ខ និងក្តីនឹករឭកពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ជាមួយនឹងការថ្លែងអំណរគុណចំពោះវីរភាព និងឆន្ទៈដ៏មោះមុត ក្រាញននៀល ក្នុងការការពារបូរណភាពទឹកដី។
លើសពីនេះ ឯកឧត្តមបណ្ឌិត ជ្រុន ថេរ៉ាវ៉ាត ក៏បានលើកឡើងពីគំរូវីរភាពរបស់កងទ័ពកម្ពុជា និងការចងចាំទុកក្នុងក្រអៅបេះដូងរបស់ប្រជាលរដ្ឋខ្មែរ ព្រមទាំងបានគោរពជូនពរសូមអោយវីរ:កងទ័ពទាំងអស់ ឆាប់បានជាសះស្បើយ ដើម្បីបន្តបំពេញបេសកកម្មការពារទឹកដីបន្តទៀត។
ជាមួយគ្នានោះ ឯកឧត្តមបណ្ឌិត ជ្រុន ថេរ៉ាវ៉ាត ក៏បាននាំយកអំណោយ និងថវិកា ដ៏ថ្លៃថ្លារបស់សម្ដេចមហាបវរធិបតី និងលោកជំទាវបណ្ឌិត រួមទាំងសប្បុរសជន ជូនដល់វីរ:កងទ័ពទាំង ៧៣នាក់ ដោយម្នាក់ៗទទួលបាន៖ ឃីត ១កញ្ចប់ និងថវិកាមួយចំនួន ព្រមទាំងបានជូនថវិកាមួយចំនួនដល់មន្ទីរពេទ្យភូមិភាគ៤ និងមន្ទីរពេទ្យខេត្តសៀមរាប ផងដែរ ៕
