ភ្នំពេញ៖ អនុវត្តតាមអនុសាសន៍ដ៏ខ្ពង់ខ្ពស់របស់ ឯកឧត្ដម នាយឧត្ដមសេនីយ៍ ស ថេត អគ្គស្នងការនគរបាលជាតិ នៅរសៀលថ្ងៃចន្ទ ទី១៨ ខែសីហា ឆ្នាំ២០២៥ លោកឧត្ដមសេនីយ៍ទោ សិទ្ធិ ឡោះ ស្នងការ នៃស្នងការដ្ឋាននគរបាលខេត្តបន្ទាយមានជ័យ ដោយមានការអញ្ជើញចូលរួមពីលោកឧត្ដមសេនីយ៍ត្រី វង្ស វិត ស្នងការរងផែនការងារធនធានមនុស្ស និងលោកវរសេនីយ៍ឯក ឱ នរិន្ទ នាយការិយាល័យបុគ្គលិក បានអញ្ជើញជួបសំណេះសំណាលជាមួយប្អូនៗដែលជាមន្រ្តីនគរបាលថ្មីចំនួន១០នាក់ដែលបានបញ្ចប់ការសិក្សាថ្នាក់បរិញ្ញាបត្រវិទ្យាសាស្ត្រនគរបាលជំនាន់ទី១២ នៅសាលាបណ្ឌិតសភានគរបាលកម្ពុជា។
ក្នុងឱកាសនេះផងដែរលោកឧត្ដមសេនីយ៍ទោ ស្នងការ បានកោតសរសើរដល់ប្អូនៗទាំង២ភេទដែលបានខំប្រឹងប្រែងសិក្សារៀនសូត្ររហូតបានបញ្ចប់ការសិក្សាដោយជោគជ័យ។
លោកឧត្ដមសេនីយ៍ទោ ស្នងការ បានណែនាំដល់លោកស្នងការរងផែនការងារធនធានមនុស្ស និង លោកនាយការិយាល័យបុគ្គលិកត្រូវបែងចែកតួនាទីភារកិច្ចដល់ប្អូនៗទាំងអស់ទៅតាមមុខវិជ្ជានិងជំនាញដែលបានសិក្សានៅសាលាកន្លងមក។
ជាមួយគ្នានេះដែរ លោកឧត្ដមសេនីយ៍ទោ ស្នងការ ក៏បានណែនាំដល់ប្អូនៗទាំងអស់ពេលចូលបំរើការងារត្រូវគោរពវិន័យកងកម្លាំងនគរបាលជាតិឱ្យបានល្អផងដែរ ៕
