មន្ត្រីជាន់ខ្ពស់ក្រសួងសុខាភិបាល ចុះបំពេញបេសកកម្មការងារ និងសួរសុខទុក្ខ វិរ:កងទ័ពកំពុងសម្រាកព្យាបាល និងក្រុមគ្រូពេទ្យ ព្រមទាំងប្រគល់អំណោយឱសថមួយចំនួនជូនដល់មន្ទីរសុខាភិបាលខេត្តព្រះវិហារ

ភ្នំពេញ៖ កាលពីថ្ងៃព្រហស្បតិ៍ ទី៧ ខែសីហា ឆ្នាំ២០២៥ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានបំពេញបេសកកម្មនៅខេត្តព្រះវិហារ និងបាននាំយកអំណោយជាថវិកា និងឱសថមួយចំនួន របស់សប្បុរសជនខ្មែររស់នៅប្រទេសអូទ្រីស ជូនដល់ក្រុមគ្រូពេទ្យ ដែលកំពុងបំពេញភារកិច្ចផ្តល់សេវាពិនិត្យ ព្យាបាលជំងឺជូនប្រជាជនភៀសសឹក នៅមណ្ឌលសុវត្ថិភាពវត្តគិរីទួលអណ្តែត មណ្ឌលសុវត្ថិភាពវត្តពោធិ៍ ៥០០០ដើម និងផ្តល់ជូនវិរ:កងទ័ពជួរមុខ ដែលកំពុងសម្រាកព្យាបាលនៅមន្ទីរពេទ្យគូលែន នៃខេត្តព្រះវិហារ។ 

មុនចុះពិនិត្យ និងបំពេញការងារមនុស្សធម៌នៅតាមទីតាំងខាងលេីនេះ លោកជំទាវរដ្ឋលេខាធិការ ក៏បានប្រគល់ឱសថមួយចំនួន ជូនដល់មន្ទីរសុខាភិបាលខេត្តព្រះវិហារ ដែលជាអំណោយសប្បុរសធម៍របស់ក្រុមហ៊ុនឱសថ MGHKH Healthcare Co., Ltd. ដេីម្បីចូលរួមចំណែកគាំទ្រដល់ក្រុមគ្រូពេទ្យដែលជា ”កងទ័ពអាវស” ប្រេីប្រាស់ក្នុងការបម្រេីសេវាពិនិត្យព្យាបាលជំងឺជូនប្រជាជនភៀសសឹក និងជូនវិរ:កងទ័ពកម្ពុជាដ៏អង់អាចក្លាហាន ការពារជាតិមាតុភូមិ។  

ជាមួយគ្នានេះដែរ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល អមដំណេីរដោយថ្នាក់ដឹកនាំ ក្រសួងសុខាភិបាល រួមមានឯកឧត្តមវេជ្ជបណ្ឌិត សាន់ សាប់អី រដ្ឋលេខាធិការ ឯកឧត្តមវេជ្ជបណ្ឌិត នាង ភារិទ្ធ រដ្ឋលេខាធិការ ឯកឧត្តមវេជ្ជបណ្ឌិត ស៊ឹម ស៊ូយ៉េង អនុរដ្ឋលេខាធិការ ឯកឧត្តមវេជ្ជបណ្ឌិត ជូ ម៉េងចាន់ អនុរដ្ឋលេខាធិការ និងឯកឧត្តម ពាស់ មូស្លីម អនុរដ្ឋលេខាធិការ និងលោកវេជ្ជបណ្ឌិត​ ឈិត​ សុផល​ ប្រធាននាយកដ្ឋានសុខភាពផ្លូវចិត្ត នៃក្រសួងសុខាភិបាល បានចុះពិនិត្យការងារពិនិត្យ ព្យាបាលជំងឺ សំណេះសំណាលលេីកទឹកចិត្តក្រុមគ្រូពេទ្យទាំងអស់ និងសាកសួរសុខទុក្ខអ្នកជំងឺ នៅមណ្ឌលសុវត្ថិភាព វត្តគិរីទួលអណ្តែត វត្តពោធិ៍៥០០០ដើម និងនៅមន្ទីរពេទ្យគូលែន។ 

លោកជំទាវរដ្ឋលេខាធិការ បានផ្តាំផ្ញេីសាកសួរសុខទុក្ខពីសំណាក់ឯកឧត្តមសាស្ត្រាចារ្យរដ្ឋមន្ត្រីក្រសួងសុខាភិបាល ថ្នាក់ដឹកនាំ បុគ្គលិក មន្ត្រីសុខាភិបាលទាំងអស់ និងសូមគោរពថ្លែងអំណរគុណយ៉ាងជ្រាលជ្រៅជាទីបំផុតចំពោះការលះបង់ របស់វិរ:កងទ័ពកម្ពុជា ដេីម្បីជាតិមាតុភូមិកម្ពុជា និងសូមផ្តាំផ្ញើរក្រុមគ្រូពេទ្យដែលប្រចាំការនៅទីនោះ បន្តបម្រេីសេវាសុខាភិបាល ប្រកបដោយឆន្ទះខ្ពស់ គោរពនូវក្រមសីលធ៍មវិជ្ជាជីវ: ត្រូវថែរក្សាសុខភាពផ្ទាល់ខ្លួនឱ្យបានល្អ ផងដែរដេីម្បីបម្រេីប្រជាជនបានកាន់តែប្រសេីរឡេីងថែមទៀត។  

ជាចុងបញ្ចប់ លោកជំទាវរដ្ឋលេខាអិការ ជូនពរវិរៈកងទ័ពទាំងអស់ ឆាប់ជាសះស្បើយ មានសុខភាពល្អបរិបូណ៍ឡេីងវិញ ដេីម្បីបន្តជាសសរទ្រូងការពារជាតិដ៏រឹងមាំ។ លេីសពីនេះ លោកជំទាវ ក៏បានជូនពរដល់ក្រុមគ្រូពេទ្យទាំងអស់ ឱ្យមានសុខភាពល្អ បន្តបេសកកម្មជួយសង្រ្គោះអាយុជីវិតវីរ:កងទ័ព និងប្រជាជនយេីងផងដែរ ៕