ភ្នំពេញ៖ ដើម្បីឱ្យការប្រឡងប្រជែងស្របតាមនិយាមនីតិប្រតិបត្តិស្តីពី «ការប្រឡងប្រជែងជ្រើសរើសមន្ត្រីរាជការស៊ីវិល» និងស្របតាមអនុសាសន៍របស់សម្តេចធិបតី «ចេះគឺជាប់ ជាប់ដោយមោទនៈ ធ្លាក់ដោយអស់ចិត្ត» គណៈកម្មការរៀបចំការប្រឡងប្រជែង បានត្រៀមខ្លួនរួចជាស្រេច សម្រាប់ការប្រឡងប្រជែងជ្រើសរើសមន្ត្រីកសិកម្មឃុំ និងការប្រឡងប្រជែងជ្រើសរើសមន្ត្រីច្បាប់ នៅថ្ងៃស្អែកនេះ។
នារសៀលថ្ងៃទី១ ខែសីហា ឆ្នាំ២០២៥ គណៈកម្មការរៀបចំការប្រឡងប្រជែង ដឹកនាំដោយឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជាប្រធានអនុគណៈកម្មការមណ្ឌលប្រឡង បានចុះពិនិត្យដំណើរការរៀបចំមណ្ឌលប្រឡងសាកលវិទ្យាល័យភូមិន្ទភ្នំពេញដោយផ្ទាល់ ដើម្បីឱ្យប្រាកដថា ការប្រឡងប្រជែងប្រព្រឹត្តទៅដោយរលូនតាមការកំណត់។
តាមការគ្រោងទុក នៅថ្ងៃស្អែក បេក្ខជនចំនួន ៥,១១១នាក់ នឹងត្រូវចូលរួមប្រឡងប្រជែងជ្រើសរើសមន្ត្រីកសិកម្មឃុំ ឱ្យចូលបម្រើការងារនៅតាមឃុំ សង្កាត់ ក្នុងក្របខណ្ឌក្រសួងកសិកម្ម រុក្ខាប្រមាញ់ និងនេសាទ និងប្រឡងប្រជែងជ្រើសរើសមន្ត្រីច្បាប់ ឱ្យចូលបម្រើការងារនៅអគ្គលេខាធិការដ្ឋានអ្នកច្បាប់ ក្នុងក្របខណ្ឌទីស្តីការគណៈរដ្ឋមន្ត្រី នៅសាកលវិទ្យាល័យភូមិន្ទភ្នំពេញ។
គណៈកម្មការរៀបចំការប្រឡងប្រជែង សូមយកឱកាសនេះ ជូនពរដល់បេក្ខជនទាំងអស់ ដែលនឹងចូលរួមការប្រឡងនៅថ្ងៃស្អែក សូមទទួលបានលទ្ធផលគួរជាទីគាប់ចិត្ត និងសូមរក្សាសុខភាពឱ្យបានល្អ ព្រមទាំងត្រៀមខ្លួនចូលរួមប្រឡងដោយអនុវត្តន៍តាមបទប្បញ្ញត្តិ និងការណែនាំឱ្យបានគ្រប់ៗគ្នា ៕
