ភ្នំពេញ៖ លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប បានមានប្រសាសន៍ណែនាំដល់កងកម្លាំងនគរបាលទាំងអស់ ត្រូវបន្តយកចិត្តទុកដាក់ពង្រឹងកិច្ចការងារជំនាញ និងបានសង្កត់ធ្ងន់ទៅលើសកម្មភាព ឆបោកតាមប្រព័ន្ធបច្ចេកវិទ្យា (ONLINE SCAMS) ដែលនឹងបង្កការគំរាមកំហែង ធ្វើឱ្យអសន្តិសុខនៅក្នុងតំបន់ និងក្នុងពិភពលោក។ ដូចនេះទាំងការិយាល័យជំនាញ និងតាមបណ្តាអធិការដ្ឋាននគរបាលក្រុង-ស្រុកទាំងអស់ ត្រូវយកចិតទុកដាក់ឱ្យបានខ្ពស់ ត្រូវធ្វើយ៉ាងណារៀបចំចាត់វិធានការ បង្ការ ទប់ស្កាត់ និងប្រយុទ្ធប្រឆាំងការ ឆបោកតាមប្រព័ន្ធបច្ចេកវិទ្យា រួមទាំងបទល្មើសព្រហ្មទណ្ឌគ្រប់ប្រភេទផងដែរ។ និងបានជំរុញការអនុវត្ត សេចក្តីណែនាំលេខ: ០០៤ សណន ចុះថ្ងៃទី១៣ ខែមិថុនា ឆ្នាំ២០២៥ ស្តីពីវិធានការគ្រប់គ្រង បង្ការ ទប់ស្កាត់ និងបង្ក្រាប បទល្មើសអាវុធ គ្រឿងផ្ទុះ និងគ្រាប់រំសេវ ក្នុងគោលបំណងសំដៅរួមចំណែកថែរក្សា ការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម។
មានប្រសាសន៍ការលើឡើងរបស់លោកឧត្តមសេនីយ៍ទោ ហួត សុធី ក្នុងឱកាសអញ្ជើញដឹកនាំកិច្ចប្រជុំបូកសរុបលទ្ធផលកិច្ចប្រតិបត្តិការ រក្សាសន្តិសុខ សណ្ដាប់ធ្នាប់សង្គម ប្រចាំខែកក្កដា ឆ្នាំ២០២៥ និងផ្សព្វផ្សាយបទបញ្ជាលេខ ០១ បប របស់រាជរដ្ឋាភិបាលកម្ពុជា និងសេចក្តីណែនាំ ព្រមទាំងទិសដៅរបស់អគ្គស្នងការដ្ឋាននគរបាលជាតិ នាព្រឹកថ្ងៃអង្គារ ទី២២ ខែកក្កដា ឆ្នាំ២០២៥ នៅសាលប្រជុំស្នងការដ្ឋាននគរបាលខេត្ត។
ដោយមានការអញ្ជើញចូលរួមពី អង្គភាពនគរបាលការពារបេតិកភណ្ឌ អង្គភាពនគរបាលទេសចរណ៍ លោក-លោកស្រី ស្នងការរងទាំងអស់ លោកនាយការិយាល័យទាំង៣៣ លោកអធិការនគរបាលក្រុង-ស្រុកទាំង១៣ ផងដែរ ៕
