ភ្នំពេញ៖ តបការគោរពអញ្ជើញពីអ្នករៀបចំកម្មវិធី ឯកឧត្តម ហួត ហាក់រដ្ឋមន្រ្តីក្រសួងទេសចរណ៍ បានផ្តល់កិត្តិយសដ៏ខ្ពង់ខ្ពស់ទទួលជួបសំណេះសំណាល និងស្វាគមន៏ការមកដល់របស់ក្រុមតារាចម្រៀងនារី K-Pop ដ៏ល្បីរបស់ពិភពលោក និងជា Queen of K-POP របស់កូរ៉េខាងត្បូងគឺក្រុម 2NE1 ដែលមកសម្តែងនៅក្នុងមហាព្រឹត្តការណ៍ប្រគំតន្រ្តីនៅកោះពេជ្រ រាជធានីភ្នំពេញ នាល្ងាចថ្ងៃទី៥ ខែកក្កដា ឆ្នាំ២០២៥នេះ។
តាមការរំពឹងទុករបស់អ្នករៀបចំកម្មវិធីព្រឹត្តការណ៏ប្រគំតន្រ្តីអន្តរជាតិដ៏ធំនេះ នឹងមានការចូលរួមពីអ្នកគាំទ្រ FAN មកពីគ្រប់ទិសទីនៃពិភពលោក និងទស្សនិកជនជាតិ និងអន្តរជាតិនៅកន្លែងផ្ទាល់រាប់ម៉ឺននាក់ និងតាមការផ្សាយបន្តផ្ទាល់រាប់លាននាក់ជុំវិញពិភពលោក។
ការរៀបចំព្រឹត្តការណ៍ប្រគំតន្រ្តីអន្តរជាតិសម្តែងដោយក្រុមតារាចម្រៀងដ៏ល្បីរបស់ពិភពលោក និងជា Queen of K-POP របស់កូរ៉េខាងត្បូងនាចំកណ្តាលបេះដូងនៃប្រទេសកម្ពុជា អាចបង្ហាញដល់ពិភពលោកថាកម្ពុជា គឺជាគោលដៅទេសចរណ៍ប្រកបដោយសុខសុវត្ថិភាព ការទទួលបដិសណ្ឋារកិច្ចដ៏កក់ក្តៅ ពោរពេញដោយយុវភាព និងជីវិតរសនិយម ព្រមទាំងមានសមត្ថភាពពេញលេញរៀបចំមហាព្រឹត្តិការណ៍ប្រគំតន្ត្រីលំដាប់ពិភពលោកបន្តបន្ទាប់ទៀត។
សូមចូលរួមទាំងអស់គ្នាផ្សព្វផ្សាយទេសចរណ៍កម្ពុជាទៅកាន់ពិភពលោក ដើម្បីនាំពិភពលោកមកកម្ពុជាវិញ! ៕
