ភ្នំពេញ៖ នាព្រឹកថ្ងៃព្រហស្បតិ៍ ទី៣ ខែកក្កដា ឆ្នាំ២០២៥ ឯកឧត្តម ហឿ សុីយ៉ែម ប្រធានក្រុមប្រឹក្សាខេត្តក្រចេះ បានអញ្ជើញចុះពិនិត្យការបំពេញការងារប្រចាំថ្ងៃរបស់រដ្ឋបាលឃុំស្នួល វិទ្យាល័យ ហ៊ុន សែន ស្នួល និងមន្ទីរពេទ្យបង្អែកស្រុក ជួបសំណេះសំណាលជាមួយបងប្អូនប្រជាពលរដ្ឋក្រីក្រជួបការលំបាក ចាស់ជរា ជនពិការ ចំនួន៥គ្រួសារ និងពិនិត្យការលក់ដូររបស់បងប្អូនអាជីវករក្នុងផ្សារស្នួល ដើម្បីឈ្វេងយល់បន្ថែមក្នុងបម្រើសេវារដ្ឋបាលសាធារណៈ សេវាសុខភាព តម្លៃទំនិញ និងការអនុវត្តគោលនយោបាយភូមិ ឃុំ សង្កាត់មានសុវត្ថិភាព ព្រមទាំងស្តាប់ពីបញ្ហាប្រឈមមួយចំនួន ដែលកើតមានក្នុងនៅមូលដ្ឋាន។ ដោយមានការចូលរួមពី លោក ស៊ុំ ជួន ប្រធានក្រុមប្រឹក្សាស្រុកស្នួល អភិបាលរងស្រុក ក្រុមប្រឹក្សាស្រុក ក្រុមប្រឹក្សាឃុំ មេភូមិ និងមន្ត្រីជាច្រើនទៀត។
ក្នុងនោះ ឯកឧត្តម ហឿ សុីយ៉ែម ប្រធានក្រុមប្រឹក្សាខេត្ត ព្រមទាំងលោកប្រធានក្រុមប្រឹក្សាស្រុក លោកស្រី អភិបាលរងស្រុកស្នួល បាននាំយកអំណោយចែកជូនបងប្អូនប្រជាពលរដ្ឋក្រីក្រជួបការលំបាក ចាស់ជរា ជនពិការ ចំនួន៥គ្រួសារ ក្នុង១គ្រួសារ ទទួលបាន អង្ករសុខភាព ៣៦កញ្ចប់, មី ១កេស, ត្រីខ ១យួរ, ទឹកត្រី ១យួរ, ទឹកសុីអុីវ ១យួរ, សារុង១ និងថវិកា ២៤មុឺនរៀល សរុបថវិកាទាំងអស់ចំនួន ៤.៥០០.០០០រៀល។
ឯកឧត្តមប្រធានក្រុមប្រឹក្សាខេត្ត ក៏បានថ្លែងអំណរគុណដល់ក្រុមគ្រូពេទ្យនៅមន្ទីរពេទ្យបង្អែកស្រុកដែលបានយកចិត្តទុកដាក់ប្រចាំការ និងការថែទាំអ្នកជំងឺ និងជួបសំណេះសំណាលបងប្អូនប្រជាពលរដ្ឋ ដែលកំពុងសម្រាកព្យាបាលជំងឺ ចំនួន ១២នាក់ ក្នុងម្នាក់ទទួលបានសារុង១ និងថវិកា ២០.០០០រៀល។
ឯកឧត្តមបន្តចុះពិនិត្យស្ថានភាពការលក់ដូរប្រចាំថ្ងៃរបស់បងប្អូនអាជីវករក្នុងផ្សារស្នួល ដោយសង្កេតឃើញថាការលក់ដូរ បន្លែ ត្រី សាច់ផ្សេងៗដែលជាផលិតផលក្នុងស្រុក ធានាផ្គត់ផ្គង់ជូនប្រជាពលរដ្ឋគ្រប់គ្រាន់ និងមានតម្លៃសមរម្យ។
ឯកឧត្តម ហឿ សុីយ៉ែម ប្រធានក្រុមប្រឹក្សាខេត្ត បានថ្លែងកោតសរសើរចំពោះ ក្រុមប្រឹក្សាស្រុក និងអាជ្ញាធរគ្រប់ថ្នាក់ ដែលបានលះបង់ និងបានខិតខំប្រឹងប្រែងក្នុងការបំពេញការងារបម្រើប្រជាពលរដ្ឋ និងបានលើកទឹកចិត្តដល់មន្ត្រីរដ្ឋបាលឃុំបន្តយកចិត្តទុកដាក់ ក្នុងការផ្តល់សេវាសាធារណៈជូនប្រជាពលរដ្ឋ និងចូលរួមដោះស្រាយបញ្ហាប្រឈមនានាដែលកើតមាន ព្រមទាំងជំរុញប្រជាពលរដ្ឋបញ្ជូនកូនៗទាំងអស់ ឱ្យទៅសិក្សារៀនសូត្រឱ្យបានច្រើនគ្រប់ៗគ្រួសារ ព្រោះវិស័យអប់រំ ជាវិស័យអតិភាពបំផុតបំរើឱ្យជីវភាពរស់នៅរៀងរាល់ថ្ងៃរបស់ប្រជាពលរដ្ឋ ៕
