ភ្នំពេញ៖ នៅព្រឹកថ្ងៃពុធ ទី១៦ ខែកញ្ញា ឆ្នាំ២០២៦នេះ ឯកឧត្តម ឯម ច័ន្ទមករា រដ្ឋលេខាធិការក្រសួងយុត្តិធម៌ បានអញ្ជើញជាតំណាងដ៏ខ្ពង់ខ្ពស់របស់ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្រ្តីក្រសួងយុត្តិធម៌ ចូលរួមក្នុងពិធីសម្ពោធដាក់ឱ្យប្រើប្រាស់ជាផ្លូវការ «មន្ទីរពេទ្យ ហ្លួង ម៉ែ» ដែលជាមន្ទីរពេទ្យផ្តល់សេវា ព្យាបាល ជំងឺមហារីក ក្រោមអធិបតីដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។
សម្តេចមហាបវរធិបតី ហ៊ុន ម៉ាណែត បានថ្លែងថា មកដល់ពេលនេះ មានមន្ទីរពេទ្យ បង្អែក ស្រុកចំនួន ៦១កន្លែង ត្រូវបានពង្រឹងគុណភាពសេវា ដើម្បីសង្គ្រោះបឋម។ ដើម្បីពង្រឹង គុណ ភាពសេវាសង្គ្រោះបឋមនៅមន្ទីរពេទ្យបង្អែកស្រុកនេះ សម្តេចបានទម្លាក់ថវិកា ១៨លាន ដុល្លារ។ សម្តេចមហាបវរធិបតី បានថ្លែងថា ការវះកាត់សង្គ្រោះបឋម មានសារៈសំខាន់ខ្លាំង។ បច្ចុប្បន្នថ្នាំលើសឈាម និងថ្នាំទឹកនោមផ្អែម ត្រូវបានយកចិត្តទុកដាក់ពង្រឹងគុណភាពថ្នាំ ហើយដំឡើងបរិមាណថ្នាំដល់ ១៥ថ្ងៃ ទៅ ៣០ថ្ងៃ។ ពីមុនទទួលបានបរិមាណថ្នាំតែ ៥ថ្ងៃ ទៅ៧ថ្ងៃប៉ុណ្ណោះ។
សម្តេចមហាបវរធិបតី ហ៊ុន ម៉ាណែត បានថ្លែងថា បច្ចុប្បន្នមានមណ្ឌលសុខភាព ៥៤០កន្លែង និងពេទ្យបង្អែក ១៤កន្លែង មានលទ្ធភាពធ្វើតេស្តមហារីកមាត់ស្បូន។ ក្នុងអាណត្តិថ្មីនេះ រាជរដ្ឋាភិបាល បាន ពង្រឹង ក្រមប្រតិបត្តិក្នុងវិស័យពេទ្យឯកជន ដោយដាក់ចេញក្រឹត្យក្រមច្បាស់លាស់។ សម្តេចមហាបវរធិបតី បានមានប្រសាសន៍ថា ក្នុងវិស័យសុខាភិបាលក្រឹត្យក្រមត្រូវតែតឹងរឹង ដើម្បីធានាសុវត្ថិភាពរបស់អ្នកជំងឺ។
សម្តេចមហាបវរធិបតី ហ៊ុន ម៉ាណែត ណែនាំឱ្យក្រសួងសុខាភិបាល និងក្រសួងពាក់ព័ន្ធពិនិត្យ ឱ្យ បានល្អិតល្អន់ការលក់តាមអនឡាញទាំងថ្នាំ ផលិតផលផ្នែកសុខភាព និងផលិតផលសម្រស់ និងបានហាមគ្រប់ក្រសួង ស្ថាប័នរដ្ឋ មិនអនុញ្ញាតឱ្យមានវិស័យឯកជនទៅបង្កើតសេវានៅទីតាំងក្រសួង ស្ថាប័នរដ្ឋដែលមានសេវាកម្មដូចគ្នានោះឡើយ។ សម្តេចមហាបវរធិបតី ហ៊ុន ម៉ាណែត ប្រកាសមិនអនុញ្ញាតឱ្យយកសេវាឯកជនដាក់ក្នុងទី តាំង រដ្ឋនោះឡើយ ៕
