ភ្នំពេញ៖ នារសៀលថ្ងៃទី១៤ ខែកក្កដា ឆ្នាំ២០២៦ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. និងជាប្រធានក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក) តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ បានដឹកនាំក្រុមការងារ ស.ផ.ក ចូលរួមកិច្ចប្រជុំពិនិត្យ និងពិភាក្សអំពីលទ្ធផលសិក្ខាសាលាផ្សព្វផ្សាយស្តីពី "ការជំរុញការកែលម្អរថយន្តដឹកជញ្ជូនកម្មករនិយោជិតឱ្យកាន់តែមានផាសុកភាព និងសុវត្ថិភាព និងបិទស្ទីកគ័រសម្គាល់រថយន្តដឹកជញ្ជូនកម្មករនិយោជិត" ក្រោមអធិបតីភាពលោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ.) នៅទីស្តីការក្រសួងសាធារណការ និងដឹកជញ្ជូន ដោយមានការចូលរួមពីថ្នាក់ដឹកនាំក្រសួងសាធារណការ និងដឹកជញ្ជូន ក្រសួងមហាផ្ទៃ អគ្គនាយកដ្ឋានដឹកជញ្ជូនផ្លូវគោក ព្រមទាំងតំណាងស្ថាប័នពាក់ព័ន្ធ សរុបប្រមាណជា ២០នាក់។
កិច្ចប្រជុំខាងលើ ធ្វើឡើងក្នុងគោលបំណង៖ (១). រាយការណ៍អំពីលទ្ធផលនៃការចុះធ្វើបច្ចុប្បន្នភាព និងបិទស្ទីកគ័រសម្គាល់រថយន្តដឹកជញ្ជូនកម្មករនិយោជិតនៅខេត្តស្វាយរៀង, (២). រាយការណ៍អំពីលទ្ធផលចំនួនរថយន្តដែលបានត្រួតពិនិត្យលក្ខណៈបច្ចេកទេសដោយភ្នែក តាមរយៈក្រុមការងារនៃក្រសួងសាធារណការ និងដឹកជញ្ជូន នៅខេត្តស្វាយរៀង, (៣). ពិភាក្សាអំពីយន្តការក្នុងការបន្តរៀបចំសិក្ខាសាលាផ្សព្វផ្សាយស្តីពី "ការជំរុញការកែលម្អរថយន្តដឹកជញ្ជូនកម្មករនិយោជិតឱ្យកាន់តែមានផាសុកភាព និងសុវត្ថិភាព និងបិទស្ទីកគ័រសម្គាល់រថយន្តដឹកជញ្ជូនកម្មករនិយោជិត" ជូនអ្នកបើកបររថយន្តដឹកជញ្ជូនកម្មករនិយោជិត ស្ថិតិនៅខេត្តកំពង់ឆ្នាំង និង(៤). ពិភាក្សាអំពីការងារទិសដៅអនុវបន្ត។
នៅក្នុងកិច្ចប្រជុំនោះដែរ ឯកឧត្តមបណ្ឌិតប្រធានក្រុមការងារ ស.ផ.ក បានបង្ហាញពីជំហរក្នុងការបន្តសហការយ៉ាងពេញទំហឹងជាមួយក្រសួងសាធារណការ និងដឹកជញ្ជូន ស្នងការដ្ឋាននគរបាលរាជធានី/ខេត្ត ស្ថាប័នពាក់ព័ន្ធ និងដៃគូទាំងអស់ ដើម្បីចុះត្រួតពិនិត្យលក្ខណៈបច្ចេកទេស ធ្វើបច្ចុប្បន្នភាព និងបិទស្ទីកគ័រសម្គាល់រថយន្ត ព្រមទាំងជំរុញការកែលម្អរថយន្តដឹកជញ្ជូនកម្មករនិយោជិត ឱ្យកាន់តែមានសុវត្ថិភាព និងផាសុកភាព ស្របតាមអនុសាសន៍ណែនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
ជាមួយគ្នានោះដែរ លោកជំទាវអគ្គលេខាធិការ គ.ស.ច.គ. បានបង្ហាញការយល់ស្របទៅលើចំណុចមួយចំនួន និងវាយតម្លៃខ្ពស់ចំពោះទិសដៅការងារបន្តរបស់ក្រុមការងារ ស.ផ.ក ដោយបានជំរុញឱ្យគ្រប់ភាគីពាក់ព័ន្ធទាំងអស់ បន្តសហការគ្នាឱ្យកាន់តែស្អិតរមួត ក្នុងការចុះធ្វើបច្ចុប្បន្នភាព និងកែលម្អរថយន្តដឹកជញ្ជូនកម្មករនិយោជិតនៅតាមបណ្តាខេត្តគោលដៅ ឱ្យទទួលបានលទ្ធផលកាន់តែប្រសើរឡើង ៕
