ក្រចេះ៖ អនុវត្តតាមអនុសាសន៍ដ៏ខ្ពង់ខ្ពស់របស់ឯកឧត្តម នាយឧត្តមសេនីយ៍ អគ្គស្នងការនគរបាលជាតិ ក៏ដូចជាអនុវត្តតាមការចង្អុលណែនាំរបស់ឯកឧត្តម វ៉ា ថន អភិបាល នៃគណៈអភិបាលខេត្តក្រចេះ នាថ្ងៃទី១៤ ខែកក្កដា ឆ្នាំ២០២៦ លោកឧត្តមសេនីយ៍ទោ អ៊ូ សុបុណ្ណា ស្នងការនគរបាលខេត្តក្រចេះ បានអញ្ជើញចុះជួបសំណេះសំណាល និងពិនិត្យស្ថានភាពទូទៅ ដើម្បីពង្រឹងកិច្ចការងារបន្ថែមនៅគ្រប់បណ្តាប៉ុស្តិ៍នគរបាលរដ្ឋបាលចំណុះឱ្យអធិការដ្ឋាននគរបាលស្រុកឆ្លូង។
ជាមួយគ្នានោះ លោកឧត្តមសេនីយ៍ស្នងការ បានមានប្រសាសន៍ជម្រុញដល់នគរបាលប៉ុស្តិ៍ ឱ្យបន្តយកចិត្តទុកដាក់បំពេញភារកិច្ចការងារអោយបានខ្ជាប់ខ្ជួន បង្កើនការល្បាត ថែទាំសម្ភារៈប្រើប្រាស់ដែលមានស្រាប់អោយបានល្អប្រសើរ និងធ្វើអនាម័យទាំងក្នុងនិងបរិវេណខាងក្រៅកន្លែងធ្វើការ។ ពិសេសបន្តសកម្មភាពចុះត្រួតពិនិត្យរដ្ឋបាល តាមទីតាំងរស់នៅប្រមូលផ្តុំ និងផ្សព្វផ្សាយអនុក្រឹតលេខ០៣ អនក្រ.បក ចុះថ្ងៃទី៥ ខែមករា ឆ្នាំ២០២៦ របស់រាជរដ្ឋាភិបាលកម្ពុជា និងច្បាប់ស្តីពីអំពើឆបោក តាមប្រព័ន្ធបច្ចេកវិទ្យា ៕
