ភ្នំពេញ៖ ឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានផ្ញើសារទៅកាន់ប្អូនៗទាំងអស់គ្នា ដែលជាយុវជន ដ៏មានតម្លៃ និងយុវតី ដ៏មានកិត្តិយស ដែលកំពុងឈរនៅត្រង់ចំណុចរបត់ដ៏សំខាន់នៃជីវិត។ ប្អូនៗជាមនុស្សឆ្លាតវៃ! ប្អូនៗជាមនុស្សរឹងមាំ! ប្អូនៗមានសុបិនដែលកំពុងពុះកញ្ជ្រោលនៅក្នុងចិត្ត ប៉ុន្តែឥឡូវនេះ ប្រហែលជាមានគេ កំពុងនិយាយអូសទាញក្នុងត្រចៀកប្អូនៗថា៖ “ចូលមកជាមួយពួកយើង! ពួកយើងការពារអ្នក! ពួកយើង ជាគ្រួសារតែមួយ! យើងនឹងធ្វើឱ្យអ្នកក្លាយជាមនុស្សមានតម្លៃម្នាក់។”
តើជាពាក្យសម្តីទាំងអស់នោះមែនទេ?
វាជាការបោកប្រាស់ ដែលសម្ងំលាក់ខ្លួនក្រោមភាពស្មោះត្រង់ក្លែងក្លាយ។ ក្រុមក្មេងទំនើងទាំងនោះ មិនអាចផ្តល់អំណាចអ្វីឱ្យប្អូនៗបានទេ តែពួកគេ មានតែដកអំណាចចេញពីខ្លួនប្អូនៗទៅវិញទេ។ ពួកគេ សន្យាចំពោះរឿងមានបានអ្វីមួយ ប៉ុន្តែអ្វីដែលពួកគេ ផ្តល់គឺជាខ្សែចងទេ។ ពួកគេ បោកប្រាស់អ្នកដោយបង្ហាញថា បានប្រាក់ បានកិត្តិយស និងបានការគាំពារ ប៉ុន្តែការពិតអ្វីដែលពួកគេ ផ្តល់ដល់ប្អូនៗទាំងអស់គ្នានោះ គឺផ្លូវជាផ្លូវទ័លមួយពោរពេញទៅដោយអំពើហិង្សា ការញៀនថ្នាំ ការជាប់ក្នុងសៀវភៅកំណត់ហេតុរបស់នគរបាល និងការសោកស្តាយតែប៉ុណ្ណោះ។
ចូរប្អូនៗ សាកគិតវាមើលសិន!
ការសិក្សាបង្ហាញថា ពេលប្អូនៗ សម្រេចជ្រើសយកវិថីជីវិតបែបនោះ ប្អូនៗនឹងបាត់បង់ឱកាសក្នុងការសិក្សា។ ប្អូនៗក៏ត្រូវប្រឈមនឹងការចាប់ខ្លួន រងរបួស ឬអាចមានរឿងរ៉ាវផ្សេងៗទៀត ដែលអាក្រក់ជាងនេះ។ ទោះបីជាប្អូនៗ ចាកចេញពីវាក៏ដោយ ក៏ផលប៉ះពាល់នៅតែបន្តតាមលងបន្លាចប្អូនៗដូចជា៖ ពិបាករកការងារធ្វើ ការបាត់បង់ទំនុកចិត្តនិងបញ្ហាសុខភាព ដែលបណ្តាលមកពីសម្ពាធនៃជីវិតតាមចិញ្ចើមផ្លូវទាំងនោះ។
តើ “គ្រួសារ” ដែលប្អូនៗបានគិតនោះ អាចជួយប្អូនៗបានមែនទេ?
ជាញឹកញយ វាក្លាយទៅជាការដាក់សម្ពាធ ភាពភ័យខ្លាច និងការដើរដល់ផ្លូវទ័លតែប៉ុណ្ណោះ។ មនុស្សជាច្រើន ដែលបានក្លាយជាក្មេងទំនើង រួចហើយ តែងតែនិយាយភាសាដូចៗគ្នាថា ពួកគេ សោកស្តាយនិងចង់ត្រឡប់ក្រោយវិញ។ អ្នកខ្លះ បាត់បង់មិត្តភក្តិ ដោយសារគ្រាប់កាំភ្លើង។ អ្នកខ្លះបាត់បង់អនាគតខ្លួនឯង ដោយសារធ្លាក់ចូលក្នុងបញ្ហាគ្រឿងញៀន ឬដេកក្នុងពន្ធនាគារជាដើម។
ប្អូនៗ មិនគួរធ្លាក់ខ្លួនចូលទៅក្នុងផ្លូវបែបនោះទាល់តែសោះ! ប្អូនៗ កើតមកដើម្បីធ្វើអ្វីៗដែលអស្ចារ្យនិងមានប្រយោជន៍ជាងនេះ។
តើអ្វីជាអំណាចពិតប្រាកដ?
ពេលភ្ញាក់ឡើងរៀងរាល់ព្រឹក ប្អូនៗត្រូវចងចាំថា អនាគតរបស់ប្អូនៗ ស្ថិតនៅក្នុងដៃប្អូនៗខ្លួនឯង មិនមែននៅក្នុងការបង្គាប់បញ្ជារបស់មេក្រុមក្មេងទំនើងណាម្នាក់នោះទេ។
តើអ្វីជាកិត្តិយសពិតប្រាកដ?
វាកើតចេញពីការកសាងអ្វីដែលមានតម្លៃយូរអង្វែង ដូចជា៖ ការបានបញ្ចប់ការសិក្សា ការរៀនយកជំនាញ ការចាប់ផ្តើមអាជីវកម្ម ការបង្កើតស្នាដៃសិល្បៈ ការលេងកីឡា និងការជួយដល់សហគមន៍ជាដើម។
តើអ្វីជាគ្រួសារពិតប្រាកដ?
គឺមនុស្សដែលលើកស្ទួយប្អូនៗ ឱ្យខ្ពស់ឡើង មានដូចជា៖ ឪពុកម្តាយ គ្រូបង្រៀន អ្នកណែនាំ និងមិត្តភក្តិដែលជំរុញប្អូនៗ ឱ្យឈានទៅរកភាពជោគជ័យ មិនមែនរស់នៅក្នុងស្ថានភាពឱ្យតែមានជីវិតរស់នោះទេ។
ខ្ញុំបានឃើញរឿងរ៉ាវជាច្រើន!
មានយុវជនល្អៗជាច្រើន ដែលបានបដិសេធចោលនូវការទទួលរងសម្ពាធទាំងនោះ ហើយពួកគេ បានកសាងជីវិតដ៏អស្ចារ្យ។ អតីតសមាជិកក្រុមក្មេងទំនើង ដែលបានប្តូរជីវិត បានរកឃើញគោលដៅជីវិតថ្មី បង្កើតអាជីវកម្ម ក្លាយជាសិល្បករ អ្នកណែនាំ ថែមទាំងបានក្លាយជាអ្នកជោគជ័យធំៗ ដែលជួយអ្នកដទៃ ឱ្យគេចផុតពីអន្ទាក់ដូចគ្នានោះទៀតផង។ ពួកគេ មិនរង់ចាំការអនុញ្ញាតពីអ្នកណានោះឡើយ ប៉ុន្តែពួកគេ ជ្រើសយកវិន័យ ការអប់រំ និងសកម្មភាពវិជ្ជមានដោយខ្លួនឯង។ ពួកគេបានជ្រើសរើសនៅជុំវិញខ្លួនដោយមនុស្សដែលមានគោលដៅក្នុងជីវិត មិនមែនមនុស្សដែលរស់ដោយគ្មានទិសដៅឡើយ។
ប្អូនៗ ក៏អាចក្លាយជាមនុស្សល្អ ដូចពួកគេទាំងនោះបានដែរ!
ឥឡូវនេះ ពិភពលោក ពោរពេញទៅដោយឱកាសសម្រាប់អ្នកដែលមានថាមពល និងសក្តានុពលដូចប្អូនៗ។ សូមចូលរួមជាមួយក្រុមកីឡាករ កីឡាការិនី កម្មវិធីក្រៅម៉ោងសិក្សា ការបណ្តុះបណ្តាលការងារ តន្ត្រី បច្ចេកវិទ្យា ជំនាញវិជ្ជាជីវៈ … ដែលធ្វើឱ្យប្អូនៗ មានកម្លាំងចិត្ត។ ត្រូវបដិសេធរាល់អន្ទាក់អូសទាញទាំងឡាយ និងត្រូវកសាងបុគ្គលិកលក្ខណៈដ៏រឹងមាំសម្រាប់ខ្លួនឯង។
ជូនចំពោះយុវជនទាំងអស់!
ជោគវាសនារបស់ប្អូនៗ មិនមែនស្ថិតលើការកំណត់របស់ក្រុមក្មេងទំនើងនោះទេ។ វាជារឿងជីវិតផ្ទាល់របស់ប្អូនៗ។ ដូច្នេះប្អូនៗ ត្រូវសរសេរវាសនាជីវិតដោយខ្លួនឯង ដោយភាពក្លាហាន។ ត្រូវដើរចេញពីសម្ពាធទាំងនោះ។ និយាយជាមួយនរណាម្នាក់ដែលប្អូនៗ ទុកចិត្តដូចជា៖ ឪពុកម្តាយ អ្នកជួយប្រឹក្សា ឬគ្រូបង្វឹកជាដើម។ ចូលរួមសកម្មភាពវិជ្ជមាន ចាប់ពីថ្ងៃនេះតទៅ។ សូមបង្កើតជំនាញ ចាប់យកតាមគោលដៅ និងការពារភាពសុខសាន្ត និងអនាគតរបស់ប្អូនៗ។
ប្អូនៗ មិនមែននៅឯកោនោះទេ!
ប្អូនៗ ជាមនុស្សមានតម្លៃ។ ផ្លូវមិនត្រូវបានបិទសម្រាប់ប្អូនៗនោះទេ ពោលគឺមានតែការសម្រេចចិត្តរបស់ប្អូនៗ នៅថ្ងៃនេះប៉ុណ្ណោះ ដែលអាចកំណត់អនាគតរបស់ប្អូនៗបាន។
ចូរប្អូនៗ ក្រោកឈរឡើង!
ត្រូវជ្រើសយកសេរីភាព! ជ្រើសរើសយកភាពរីកចម្រើន! ជ្រើសយកមរតកដែលកូនៗជំនាន់ក្រោយរបស់ប្អូនៗ នឹងមានមោទនភាព មិនមែនមរតកដែលធ្វើឱ្យពួកគេ ខ្លាចនោះទេ។ សូមចាំថា ជីវិតក្នុងក្រុមក្មេងទំនើង បញ្ចប់ដោយភាពងងឹត។
តើជីវិតពិតរបស់ប្អូនៗ យ៉ាងណាវិញ?
វាអាចភ្លឺបំផុតដល់ថ្នាក់បំភ្លឺសហគមន៍ទាំងមូលបានទៀតផង។ ប្អូនៗមានអំណាច។ ចូរប្រើវាដោយគតិបណ្ឌិត។ ពិភពលោក កំពុងរង់ចាំមើលរឿងដ៏អស្ចារ្យ ដែលប្អូនៗនឹងធ្វើ។
តស់! យើងមកសាងអនាគតជាមួយគ្នា តាមផ្លូវដ៏ត្រឹមត្រូវ ៕
