ភ្នំពេញ៖ ឧបាសិកា សុទ្ធោ បុប្ផានី គឺជាអតីតមិត្តរួមជំនាន់សាលាបាក់ទូកនាទសវត្សឆ្នាំ១៩៨០ បានទទួលមរណៈភាព កាលពីថ្ងៃទី១០ ខែកុម្ភៈ ឆ្នាំ២០២៦ វេលាម៉ោង៧និង០០នាទីព្រឹក ក្នុងជន្មាយុ៥៤ឆ្នាំ ដោយរោគាពាធ ហើយជាស្ត្រីមេម៉ាយមានកូន០២នាក់ ខ្វះលទ្ធភាព និងញាតិមិត្តធ្វើបុណ្យសពឱ្យផងនោះ។
ភ្លាមៗ ក្រោយពេលបានទទួលដំណឹងដ៏ក្រៀមក្រំនេះ នៅថ្ងៃទី១១ ខែកុម្ភៈ ឆ្នាំ២០២៦ ក្រុមអតីតមិត្តភក្តិរួមជំនាន់សាលាបាក់ទូក មួយក្រុមរួមមានទាំង ឯកឧត្តម ឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស ជាមេបញ្ជាការ កងរាជអាវុធហត្ថរាជធានីភ្នំពេញ បាននាំយកថវិកាមួយចំនួន ទឹកសុទ្ធ ភេសជ្ជៈចម្រុះ ទៅប្រគល់ជូនគ្រួសារសពឧបាសិកា សុទ្ធោ បុប្ផានី ដើម្បីរៀបចំធ្វើពិធីបុណ្យសព។ ក្រុមអតីតសិស្សសាលាបាក់ទូកម្នាក់ៗ បាននាំគ្នាចូលរួមជាថវិកា តាមសទ្ធារៀងៗខ្លួន សម្រាប់រ៉ាប់រងការចំណាយធ្វើបុណ្យសពឧបាសិកា សុទ្ធោ បុប្ផានី រហូតដល់ចប់រួចរាល់ ហើយកន្លងមកនៅពេលដែលឧបាសិកា សុទ្ធោ បុប្ផានី នៅមានជីវិតហើយមានជំងឺចូលមន្ទីរពេទ្យម្ដងៗគឺមិត្តរួមជំនាន់តែងតែរួមគ្នាជួយចេញឧបត្ថម្ភថ្លៃព្យាបាលជាបន្តបន្ទាប់ផងដែរ។ សពឧបាសិកា សុទ្ធោ បុប្ផានី ត្រូវបានតម្កល់ធ្វើបុណ្យតាមប្រពៃណីព្រះពុទ្ធសាសនា នៅវត្តភ្នៀតសិម្ពលី សង្កាត់ស្នោរ ខណ្ឌកំបូល រាជធានីភ្នំពេញ។
កាយវិការ ដ៏គួរឲ្យគោរពរបស់ក្រុមអតីតសិស្សបាក់ទូកមួយក្រុមនេះ គឺតែងតែធ្វើជាប់ជាប្រចាំ ចំពោះអតីតលោកគ្រូអ្នកគ្រូគ្រប់គ្នា និងជួយដល់មិត្តរួមជំនាន់ដែលជួបការលំបាកហើយខ្វះលទ្ធភាព មកជាច្រើនឆ្នាំមកហើយ ស្របតាមពាក្យស្លោករបស់ក្រុម ដែលបានបង្កើតឡើងថា "សាមគ្គីមិត្តភាព បង្កើតចិត្តរមនា ចែករំលែកជួយគ្នា គ្រប់គ្រាលំបាក" ហើយកាយវិកា នាពេលនេះ បានទទួលការថ្លែងអំណរគុណយ៉ាងជ្រាលជ្រៅបំផុត ពីក្រុមគ្រួសារនៃសពផងដែរ ៕
