បណ្ឌិត កៅ ថាច ចូលរួមជាអធិបតី និងកិច្ចពិភាក្សា ក្នុងសន្និសីទមីក្រូហិរញ្ញវត្ថុប្រចាំឆ្នាំ២០២៥

ភ្នំពេញ៖ នារសៀលថ្ងៃសុក្រ ១៥កើត ខែមិគសិរ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី៥ ខែធ្នូ ឆ្នាំ២០២៥ នេះ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) បានអញ្ជើញចូលរួមជាអធិបតី និងជាវាគ្មិនកិត្តិយស ក្នុងកិច្ចពិភាក្សាក្រោមប្រធានបទ “Financing the Future: Connecting Capital to Impact on Climate” ក្នុងសន្និសីទមីក្រូហិរញ្ញវត្ថុប្រចាំឆ្នាំ២០២៥ ដែលប្រារព្ធធ្វើឡើងនៅខេត្តសៀមរាប។ 

ក្នុងកិច្ចពិភាក្សាដ៏មានសារៈសំខាន់នេះ, ឯកឧត្តមបណ្ឌិត បានចែករំលែកនូវស្ថានភាពនៃការវិវត្តនៃហិរញ្ញប្បទានបៃតង និងទស្សនវិស័យនៃហិរញ្ញប្បទានបៃតងសម្រាប់អនាគត តាមរយៈការសង្កត់ធ្ងន់ទៅលើមូលបទចំនួន៥ សំខាន់ៗ រួមមាន៖

១-ស្ថាបត្យកម្មនៃហិរញ្ញប្បទានបៃតង (Green Finance Architecture)

២-ហានិភ័យពាក់ព័ន្ធនឹងហិរញ្ញប្បទានបៃតង និងយន្តការកាត់បន្ថយហានិភ័យ (Risk Involvement in Green Financing and How to De-Risk)

៣-ឧបករណ៍ហិរញ្ញប្បទានបៃតង (Green Finance Instruments)

៤-ការវិនិយោគលើហិរញ្ញប្បទានបៃតង (Investment in Green Finance)

៥-ឧត្តមានុវត្តរបស់ធនាគារអភិវឌ្ឍន៍ជនបទ និងកសិកម្ម (ARDB Best Practice) ក្នុងការចូលរួមអភិវឌ្ឍហិរញ្ញប្បទានបៃតងនៅកម្ពុជា។

បន្ថែមពីនេះ, ឯកឧត្តមបណ្ឌិត ក៏បានលើកទឹកចិត្តយ៉ាងខ្លាំងក្លាដល់គ្រឹះស្ថានមីក្រូហិរញ្ញវត្ថុទាំងអស់ ឱ្យចូលរួមដំណើរឆ្ពោះទៅរកហិរញ្ញប្បទានបៃតង ដោយ៖

១-បង្កើននិងពិពិធកម្ម សំពៀតឥណទានទៅរកហិរញ្ញប្បទានបៃតង។

២-បង្កើតឧបករណ៍ ហិរញ្ញប្បទានបៃតងឱ្យកាន់តែសម្បូរបែប។

៣-បង្កើនបរិយាប័ន្ន ហិរញ្ញប្បទានបៃតង។

សកម្មភាពទាំងនេះ គឺសំដៅចូលរួមអភិវឌ្ឍវិស័យហិរញ្ញវត្ថុប្រកបដោយចីរភាព និងបរិយាប័ន្ន សម្រាប់ប្រទេសកម្ពុជា ៕