ភ្នំពេញ៖ ឯកឧត្ដម គួច ចំរើន អភិបាល នៃគណៈអភិបាលខេត្តកណ្ដាល បានថ្លែងថា ភាពជាអ្នកដឹកនាំ គឺជាសិល្បៈនៃការគិត និងការសម្រេច ហើយសារៈប្រយោជន៍ នៃភាពជាអ្នកដឹកនាំ សម្រាប់ប្រើប្រាស់ក្នុងជីវិតរស់នៅរបស់មនុស្សទាំងអស់គ្នា។
ការលើកឡើងរបស់ ឯកឧត្ដមអភិបាលខេត្តកណ្ដាល នាឱកាសអញ្ជើញចូលរួមធ្វើបាឋកថា ជូនដល់មន្ត្រីរាជការ សិស្សមន្ត្រី និងកម្មសិក្សាការី ឆ្នាំ ២០២៥ នៃសាលាភូមិន្ទរដ្ឋបាល លើប្រធានបទស្តីពី “ភាព ជាអ្នកដឹកនាំ និងនវានុវត្តន៍” នៅថ្ងៃទី១០ ខែវិច្ឆិកា ឆ្នាំ២០២៥។
ឯកឧត្ដម គួច ចំរើន បានសង្កត់ធ្ងន់ថា ភាពជាអ្នកដឹកនាំ គឺជាសិល្បៈនៃការគិត និងការសម្រេច។ សារៈប្រយោជន៍នៃភាពជាអ្នកដឹកនាំសម្រាប់ប្រើប្រាស់ក្នុងជីវិតរស់នៅរបស់មនុស្សទាំងអស់ ទាំងមន្រ្តីរាជការ កម្មករ កសិករ សិស្ស និសិ្សត និងប្រជាពលរដ្ឋគ្រប់រូបដើម្បីដឹកនាំជីវិត និងការងារឆ្ពោះទៅកាន់អនាគតរៀងៗខ្លួន។ ភាពជាអ្នកដឹកនាំ (Leadership) គឺត្រូវប្រើប្រាស់ជាចាំបាច់នៅពេលយើងជួបការលំបាកនៅក្នុងជីវិតរស់នៅប្រចាំថ្ងៃ ពិសេសក្នុងកាលៈទេសៈដែលសភាពការណ៍ពិភពលោកកំពុងវិវត្តប្រែប្រួលឆាប់រហ័ស និងប្រឈមជាមួយភាពមិនប្រាកដប្រជាដូចសព្វថ្ងៃនេះ។
ឯកឧត្ដមអភិបាលខេត្ត បានសម្តែងនូវក្តីសង្ឃឹមយ៉ាងមុតមាំថា បាឋកថានៅថ្ងៃនេះ នឹងជួយរួមចំណែកផ្តល់ជាចំណេះដឹង និងបទពិសោធន៍ សម្រាប់កម្មសិក្សាការីដែលជាមន្ត្រីរាជការទាំងអស់យល់កាន់តែច្បាស់មួយកម្រិតទៀតពីសារ:សំខាន់នៃការផ្តល់សេវាសាធារណៈ និងការបម្រើសេវាសាធារណៈ ដើម្បីលើកកម្ពស់ប្រសិទ្ធភាព និងការបង្ខិតសេវាសាធារណៈជាតម្រូវការចាំបាច់នានាឲ្យខិតកាន់តែភ្ជាប់ជិតស្និទរវាងអ្នកបម្រើសេវា និងអតិថិជនអ្នកទទួលសេវា គឺប្រជាពលរដ្ឋ ៕
