ឯកឧត្តមរដ្ឋមន្ត្រី ថោ ជេដ្ឋា អញ្ជើញអមដំណើរឯកឧត្តមឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី ចុះពិនិត្យរោងចក្រម្សៅដំឡូងមី ក្នុងភូមិសាស្ត្រខេត្តកំពង់ធំ

ភ្នំពេញ៖ នៅថ្ងៃអាទិត្យ ៥កើត ខែកត្តិក ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៦ ខែតុលា ឆ្នាំ២០២៥នេះ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាអនុប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ បានអញ្ជើញអមដំណើរ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ ដើម្បីចុះពិនិត្យរោងចក្រម្សៅដំឡូងមី ឧកញ៉ា អាន ម៉ាឌី ស្រុកបារាយណ៍ និងការដ្ឋានសាងសង់រោងចក្រ A.V.C. Investment Co., Ltd ស្ថិតក្នុងភូមិសាស្ត្រស្រុកស្ទោង ខេត្តកំពង់ធំ។

សូមជម្រាបថា ក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ បាននិងកំពុងសហការគ្នាយ៉ាងសកម្ម ដើម្បីទាក់ទាញវិនិយោគិនលើវិស័យជាច្រើនឱ្យមកវិនិយោគក្នុងខេត្តកំពង់ធំ ដែលជាផ្នែកមួយយ៉ាងសំខាន់ក្នុងការជំរុញដល់ការអភិវឌ្ឍសេដ្ឋកិច្ច បង្កើតការងារជូនប្រជាពលរដ្ឋ និងពង្រឹងមូលដ្ឋានសេដ្ឋកិច្ចរបស់ខេត្ត។ លើសពីនេះ ការបង្កើតនូវរោងចក្រឧស្សាហកម្ម ក៏នឹងអាចជួយធ្វើពិពិធកម្មមូលដ្ឋានសេដ្ឋកិច្ចខេត្តកំពង់ធំ ពីការពឹងផ្អែកខ្លាំងលើវិស័យកសិកម្ម ងាកមករកវិស័យឧស្សាហកម្ម និងកសិ-ឧស្សាហកម្ម ដែលនឹងជួយជំរុញសេដ្ឋកិច្ចរបស់ខេត្តកំពង់ធំ ក៏ដូចជាទូទាំងប្រទេស ព្រមទាំងជួយបង្កើតការងារនិងប្រាក់ចំណូលបន្ថែមជូនប្រជាជនផងដែរ។

សូមបញ្ជាក់ថា បណ្ដុំរោងចក្រ A.V.C. Investment Co., Ltd គឺជាមជ្ឈមណ្ឌលកែច្នៃកសិផលសម្រាប់នាំចេញ ដែលមានដូចជា រោងចក្រអាហារកក (Frozen Food Factory) រោងចក្រកែច្នៃស្វាយចន្ទី (Cashew Processing Factory) រោងចក្រកែច្នៃដំឡូងមី (Cassava Processing Factory) រោងចក្រផលិតជីវធ្យូង (Biochar Production Factory) និងរោងចក្រជីសរីរាង្គជីវសាស្ត្រ (Microbiological Organic Fertilizer Factory) ជាដើម ៕