ភ្នំពេញ៖ ឯកឧត្តម ឧត្តមសេនីយ៍ឯក ឯម វិចិត្រ អគ្គាធិការ នៃអគ្គាធិការដ្ឋាន ក្រសួងមហាផ្ទៃ សូមផ្ញើសារលិខិតគោរពជូនពរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសពិធីចម្រើនជន្មាយុគម្រប់ ៤៨ឆ្នាំ ឈានចូល ៤៩ឆ្នាំ ដែលនឹងប្រព្រឹត្តទៅនៅថ្ងៃចន្ទ ១៣រោច ខែអស្សុជ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២០ ខែតុលា ឆ្នាំ២០២៥ ខាងមុខនេះ។
សារលិខិតគោរពជូនពររបស់ឯកឧត្តម ឧត្តមសេនីយ៍ឯក ឯម វិចិត្រ មានខ្លឹមសារដូចតទៅ៖ «សម្តេចមហាបវរធិបតី ជាទីគោរពដ៏ខ្ពង់ខ្ពស់! តាងនាមឱ្យថ្នាក់ដឹកនាំព្រមទាំងមន្ត្រីទាំងអស់នៃអគ្គាធិការដ្ឋាន ក្រសួងមហាផ្ទៃ យើងខ្ញុំសូមចូលរួម សម្តែងអំណរសាទរប្រកបដោយសេចក្តីសោមនស្សក្រៃលែងជូនចំពោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសប្រកបដោយសិរីមង្គលថ្លៃថ្លានៃទិវាខួបចម្រើនជន្មាយុ នាថ្ងៃទី២០ ខែតុលា ឆ្នាំ២០២៥ ខាងមុខនេះ។
ក្នុងទិវាដ៏នក្ខត្តឫក្សនេះ យើងខ្ញុំសូមសម្តែងនូវការគោរពកោតសរសើរដ៏ស្មោះចំពោះកិច្ចខិតខំប្រឹងប្រែង និងការប្តេជ្ញាចិត្តដ៏មោះមុតរបស់ សម្តេចមហាបវរធិបតី បម្រើក្នុងបុព្វហេតុជាតិមាតុភូមិ និងប្រជាជន តាមរយៈការជំរុញអនុវត្តគោលនយោបាយគន្លឹះ និងអាទិភាពនានាដែលបានកំណត់ និងដាក់ចេញនៅក្នុងយុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ក្នុងគោលដៅបន្តធានានិរន្តរភាពនៃ ដំណើរការអភិវឌ្ឍសង្គមជាតិ ឈានទៅសម្រេចបាននូវចក្ខុវិស័យនៃការប្រែក្លាយកម្ពុជាឱ្យទៅជាប្រទេសមាន ចំណូល មធ្យមកម្រិតខ្ពស់នៅឆ្នាំ២០៣០ និងមានចំណូលកម្រិតខ្ពស់នៅឆ្នាំ២០៥០ ទន្ទឹមនេះ សម្តេចមហាបវរធិបតី ក៏បានបន្តដើរតួនាទីយ៉ាងសកម្មក្នុងក្របខណ្ឌនៃកិច្ចសហប្រតិបត្តិការអន្តរជាតិ ដោយបានលើកកម្ពស់កិត្យានុភាពជាតិ លើឆាកអន្តរជាតិ និងនាំមកនូវសមិទ្ធផលផ្លែផ្កាជាច្រើន បម្រើដល់ឧត្តមប្រយោជន៍ជាតិ និងប្រជាជន រួមចំណែក យ៉ាងសំខាន់ដល់ការកសាង និងអភិវឌ្ឍសេដ្ឋកិច្ចសង្គម និងការពារនូវបូរណភាពដែនដី និងសុខមាលភាពប្រជាពលរដ្ឋ។
ជាមួយនឹងអំណរសាទរនៅក្នុងឱកាសដ៏វិសេសវិសាលនេះ ក្នុងនាមថ្នាក់ដឹកនាំព្រមទាំងមន្ត្រីរាជការទាំងអស់ នៃអគ្គាធិការដ្ឋាន ក្រសួងមហាផ្ទៃ យើងខ្ញុំសូមបួងសួងដល់គុណបុណ្យព្រះរតនត្រ័យ វត្ថុស័ក្តិសិទ្ធិទាំងឡាយ ក្នុងលោកសូមតាមបីបាច់ថែរក្សា និងប្រោះព្រំនូវសព្ទសាធុការពរ សិរីសួស្តី ជ័យមង្គល វិបុលសុខ បវរមហាប្រសើរ ជូន សម្តេចមហាបវរធិបតី នាយករដ្ឋមន្ត្រី និងលោកជំទាវបណ្ឌិត ព្រមទាំងក្រុមគ្រួសារ សូមបានប្រកបដោយ ព្រះពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។
សូម សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មេត្តាទទួលនូវសេចក្តីគោរពដ៏ជ្រាលជ្រៅ និងភក្តីភាពដ៏ស្មោះស្ម័គ្របំផុតពីយើងខ្ញុំ» ៕
