ភ្នំពេញ៖ នារសៀលថ្ងៃអាទិត្យ ៥កើត ខែកត្តិក ឆ្នាំម្សាញ់ សប្ដស័ក ពុទ្ធសករាជ ២៥៦៩ ត្រូវនឹងថ្ងៃទី២៦ ខែតុលា ឆ្នាំ២០២៥នេះ ឯកឧត្តម ថោ ជេដ្ឋា អនុប្រធានក្រុមការងារគណបក្សចុះមូលដ្ឋានខេត្តកំពង់ធំ និងជាប្រធានក្រុមការងារគណបក្សចុះមូលដ្ឋានស្រុកស្ទោង បានអញ្ជើញដឹកនាំក្រុមការងារចុះពិនិត្យជាក់ស្តែងវឌ្ឍនភាពគម្រោងសាងសង់អគារស្នាក់ការគណបក្សប្រជាជនកម្ពុជាស្រុកស្ទោងថ្មី ក្នុងមូលដ្ឋានខេត្តកំពង់ធំ ដែលសម្រេចបានប្រមាណ ៩០%។
សូមជម្រាបថា សំណង់អគារស្នាក់ការគណបក្សប្រជាជនកម្ពុជាស្រុកស្ទោងថ្មីបានចាប់ផ្តើមសាងសង់កាលពីថ្ងៃទី២៨ ខែកុម្ភៈ ឆ្នាំ២០២៥ នៅលើផ្ទៃដីប្រមាណ ២ហិកតា គឺជំនួសឱ្យអគារចាស់ដែលមានសភាពទ្រុឌទ្រោមមិនសមរម្យ។
សំណង់អគារថ្មីនេះនឹងដើរតួនាទីយ៉ាងសំខាន់បម្រើឱ្យការបំពេញភារកិច្ចរបស់មន្ត្រីគណបក្ស ការរៀបចំកិច្ចប្រជុំ និងការជួបជុំនានារបស់សមាជិក សមាជិកាគណបក្សប្រជាជនកម្ពុជានៅក្នុងមូលដ្ឋាន។ លើសពីនេះ ក៏មានទីធ្លាហាត់កីឡាធំទូលាយ ព្រមទាំងសួនច្បារដ៏ស្រស់ស្អាតសម្រាប់បម្រើឱ្យឧត្តមប្រយោជន៍ប្រជាពលរដ្ឋ និងលើកកម្ពស់សុខភាពសាធារណៈផងដែរ ៕
