ភ្នំពេញ៖ នាថ្ងៃអង្គារ ៧រោច ខែអស្សុជ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៤ ខែតុលា ឆ្នាំ២០២៥ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញជួបសំដែងការគួរសម និងពិភាក្សាការងារជាមួយ ឯកឧត្តម Dato’ Seri Dr. Ahmad Zahid bin Hamidi ឧបនាយករដ្ឋមន្ត្រី និងជារដ្ឋមន្ត្រីក្រសួងអភិវឌ្ឍន៍ជនបទ និងតំបន់នៃប្រទេសម៉ាឡេស៊ី។
ជាកិច្ចចាប់ផ្តើម ឯកឧត្តមរដ្ឋមន្ត្រី បានថ្លែងអំណរគុណចំពោះឯកឧត្តមឧបនាយករដ្ឋមន្ត្រី និងប្រតិភូដែលចំណាយពេលវេលាដ៏មានតម្លៃអញ្ជើញចូលរួមក្នុងជំនួបដ៏មានសារៈសំខាន់នាពេលនេះ។
ឯកឧត្តមរដ្ឋមន្ត្រី ក៏បានថ្លែងអំណរគុណចំពោះភាគីម៉ាឡេស៊ី ក្នុងនាមជាប្រធានអាស៊ានប្តូវេន ដែលបានធ្វើការអន្តរាគមន៍សម្របសម្រួលឱ្យមានបទឈប់បាញ់រវាងប្រទេសកម្ពុជា និងថៃ នាពេលកន្លងមក។
ជាមួយគ្នានេះ ឯកឧត្តមរដ្ឋមន្ត្រី ក៏បានជម្រាបជូនអំពីការអភិវឌ្ឍន៍របស់កម្ពុជាក្នុងសន្ទុះដ៏លឿនក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ផងដែ។
ជាងនេះទៅទៀត ឯកឧត្តមរដ្ឋមន្ត្រី ក៏បានជម្រាបជូនប្រតិភូ អំពីតួនាទី ភារៈកិច្ច និងសកម្មភាពរបស់ក្រសួង ក្នុងការអន្តរាគមន៍អភិវឌ្ឍន៍នៅតំបន់ជនបទឱ្យមានភាពរីកចម្រើន ដូចជាការរៀបចំភូមិគំរូគន្លិះ ដើម្បីធ្វើឱ្យតំបន់ជនបទមានការអភិវឌ្ឍន៍ឆាប់រហ័ស និងកាត់បន្ថយគំលាតរវាងជនបទ និងទីក្រុង។ ឯកឧត្តមរដ្ឋមន្ត្រីក៏បានស្នើសូមឱ្យមានការផ្លាស់ប្តូរ និងចែករំលែកបទពិសោធន៍រវាងគ្នា និងគ្នាផងដែរ។
ឯកឧត្តម Dato’ Seri Dr. Ahmad Zahid bin Hamidi ឧបនាយករដ្ឋមន្ត្រី និងជារដ្ឋមន្ត្រីក្រសួងអភិវឌ្ឍន៍ជនបទ និងតំបន់ នៃប្រទេសម៉ាឡេស៊ី បានថ្លែងអគុណចំពោះឯកឧត្តមរដ្ឋមន្ត្រី និងកោតសសើ និងវាយខ្ពស់ចំពោះការរីកចំរើនលើគ្រប់វិស័យរបស់កម្ពុជា។
បន្ថែមពីនេះ ឯកឧត្តមឧបនាយករដ្ឋមន្ត្រី ក៏បានសម្តែងការគាំទ្រចំពោះការផ្លាស់ប្តូរ និងចែករំលែកបទពិសោធន៍ លើវិស័យអភិរវឌ្ឍន៍ជនបទ នៃប្រទេសទាំងពីរ ឱ្យកាន់តែខ្លាំងក្លាបន្ថែមទៀត។
គួរជម្រាបជូនផងដែថា ជំនួបដែលប្រព្រឹត្តទៅនាពេលនេះ ក្នុងគោលរឹតបន្តឹងចំណងមិត្តភាព និងកិច្ចសហប្រតិបត្តិការឱ្យកាន់តែជិតស្និតរវាងក្រសួងអភិវឌ្ឍន៍ជនបទ និងតំបន់ នៃប្រទេសម៉ាឡេស៊ី ជាមួយក្រសួងអភិឌ្ឍន៍ជនបទ ប្រទេសកម្ពុជា ៕
