បរទេស៖ កាលពីថ្ងៃអាទិត្យ យោធាបាននិយាយថា ទាហានប៉ាគីស្ថាន ៥នាក់ និងសមាជិកសកម្មប្រយុទ្ធ ២៥នាក់ បានស្លាប់នៅក្នុងការប៉ះទង្គិចគ្នានៅជិតព្រំដែន ជាមួយអាហ្វហ្គានីស្ថាន ខណៈដែលគណៈប្រតិភូមកពីប្រទេសទាំង២ បានជួបគ្នាដើម្បីព្យាយាមបន្ធូរបន្ថយភាពតានតឹងបន្ទាប់ពី ការប្រយុទ្ធគ្នាដ៏សាហាវបំផុតក្នុងរយៈពេលជាច្រើនឆ្នាំ។
ប្រព័ន្ធផ្សព្វផ្សាយរបស់យោធាប៉ាគីស្ថានបាននិយាយថា ក្រុមសកម្មប្រយុទ្ធបានព្យាយាមឆ្លងកាត់ពីអាហ្វហ្គា នីស្ថាននៅថ្ងៃសុក្រ និងថ្ងៃសៅរ៍នៅក្នុងស្រុក Kurram និង North Waziristan ដែលជាភូមិសាស្រ្តមានភ្នំរដិបរដុបតាមបណ្តោយព្រំដែនភាគពាយ័ព្យរបស់ប្រទេសប៉ាគីស្ថាន។
យោធាបាននិយាយថា ការប៉ុនប៉ងជ្រៀតចូលបានបង្កឱ្យមានការសង្ស័យលើចេតនារបស់រដ្ឋាភិបាលនៅក្នុង ប្រទេសអាហ្វហ្គានីស្ថាន "ទាក់ទងនឹងការដោះស្រាយបញ្ហាភេរវកម្មដែលកើតចេញពីដីរបស់ខ្លួន"។
នៅក្នុងប្រទេសអាហ្វហ្គានីស្ថាន អ្នកនាំពាក្យសំខាន់របស់រដ្ឋាភិបាលតាលីបង់ និងក្រសួងការពារជាតិមិនបាន ឆ្លើយតបភ្លាមៗចំពោះសំណើសុំការអត្ថាធិប្បាយលើការវាយប្រហារដែលបានរាយការណ៍នោះទេ ៕
