ភ្នំពេញ៖ នារសៀលថ្ងៃពុធ ៩កើត ខែអស្សុជ ឆ្នាំម្សាញ់ សប្ដស័ក ព.ស.២៥៦៩ ត្រូវនឹងថ្ងៃទី១ ខែតុលា ឆ្នាំ២០២៥ ឯកឧត្តម ឆាយ ឫទ្ធិសែន សមាជិកគណៈកម្មាធិការកណ្តាលគណបក្សប្រជាជនកម្ពុជា អនុប្រធានទី១ ក្រុមការងារគណបក្សថ្នាក់កណ្ដាលចុះជួយខេត្តកំពង់ឆ្នាំង និងជាប្រធានក្រុមការងារគណបក្សថ្នាក់កណ្ដាលចុះជួយស្រុកសាមគ្គីមានជ័យ និងស្រុកទឹកផុស រួមដំណើរដោយ ឯកឧត្តមអនុប្រធាន ឯកឧត្ដម ប្រធាន អនុប្រធានក្រុមការងារចុះមូលដ្ឋានឃុំ នៃស្រុកសាមគ្គីមានជ័យ បានអញ្ជើញពិនិត្យអគារសាលប្រជុំស្នាក់ការគណបក្សដែលទើបស្ថាបនារួច ១០០% ស្រុកសាមគ្គីមានជ័យ ខេត្តកំពង់ឆ្នាំង។
សូមជម្រាបជូនផងដែរថា អគារសាលប្រជុំនេះ មានបណ្តោយប្រវែង ៣២ម៉ែត្រ និងទទឹង ១៣ម៉ែត្រ កម្ពស់ ៩,៩៧ម៉ែត្រ ត្រូវបានសាងសង់លើផ្ទៃដីទំហំ ៥.០៧៧ម៉ែត្រក្រឡា ស្ថិតនៅក្នុងបរិវេណនៃទីស្នាក់ការគណបក្សប្រជាជនកម្ពុជាស្រុកសាមគ្គីមានជ័យ និងត្រូវបានបញ្ចប់ការសាងសង់នៅពេលថ្មីៗនេះ ហើយគ្រោងនឹងរៀបចំពិធីក្រុងពាលី នឹងសូត្រមន្ដតាមគន្លងប្រពៃណីនិងសាសនា នៅព្រឹកថ្ងៃព្រហស្បតិ៍ ១០កើត ខែអស្សុជ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២ ខែតុលា ឆ្នាំ២០២៥ តាមសំណូមពរគណបក្សមូលដ្ឋាន។
រីឯការដាក់សម្ពោធផ្លូវការដើម្បី ប្រើប្រាស់សម្រាប់បម្រើដល់ការងារគណបក្ស នឹងរៀបចំនៅពេលអនាគតដ៏ឆាប់ខាងមុខនេះ ៕
