ភ្នំពេញ៖ នារសៀលថ្ងៃទី១៤ ខែតុលា ឆ្នាំ២០២៥ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញជាអធិបតីភាពក្នុងពិធីប្រកាសចូលកាន់មុខតំណែង លោក ប៉ុក ទាំង ជាប្រធានមន្ទីរទេសចរណ៍ខេត្តកែប ដោយមានការចូលរួមពីសំណាក់ ឯកឧត្តម អ៊ុក ថា ប្រធានក្រុមប្រឹក្សាខេត្តកែប ឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប រួមទាំងឯកឧត្តម លោកជំទាវថ្នាក់ដឹកនាំក្រសួងទេសចរណ៍ និងប្រតិភូអមដំណើរ លោក លោកស្រី អភិបាលរងខេត្ត ឯកឧត្តម ប្រធានសាលាដំបូងខេត្ត ឯកឧត្តម ព្រះរាជអាជ្ញា នៃអយ្យការអមសាលាដំបូងខេត្ត លោក មេបញ្ជាការកងកម្លាំងប្រដាប់អាវុធទាំង៣ លោក លោកស្រី ប្រធានមន្ទីរ អង្គភាពជុំវិញខេត្ត លោកអភិបាលក្រុង ស្រុក ព្រមទាំងអាជីវករ សរុបប្រមាណ ៣០០នាក់។
ថ្លែងក្នុងពិធីនេះ ឯកឧត្តមរដ្ឋមន្រ្តី បានផ្តល់អនុសាសន៍ណែនាំ ដល់ប្រធានមន្ទីរទេសចរណ៍ខេត្តកែប ត្រូវខិតខំប្រឹងប្រែងរួមគ្នាជាធ្លុងមួយជាមួយថ្នាក់ដឹកនាំ មន្ត្រីរាជការ និងមន្ត្រីកិច្ចសន្យានៃមន្ទីរទេសចរណ៍ខេត្តកែបទាំងអស់ ក្រោមការដឹកនាំរបស់រដ្ឋបាលខេត្ត ដោយឈរលើស្មារតីទទួលខុសត្រូវខ្ពស់ សាមគ្គីភាព ឯកភាពផ្ទៃក្នុង និងកិច្ចសហប្រតិបត្តិការល្អ ជាមួយមន្ទីរ-អង្គភាពជុំវិញខេត្ត, វិស័យឯកជន, ដៃគូអភិវឌ្ឍ, បណ្តាញសារព័ត៌មាន និងអ្នកផលិតមាតិកាព័ត៌មាន ដើម្បីជំរុញកំណើនភ្ញៀវទេសចរជាតិ និងអន្តរជាតិ មកលេងកម្សាន្តនៅខេត្តកែប (ធ្វើយ៉ាងណាឱ្យភ្ញៀវស្នាក់នៅកាន់តែយូរ, និង ចំណាយថវិកាកាន់តែច្រើន, ប៉ុន្តែសូមរក្សាតម្លៃឱ្យបានសមរម្យ)។
ជាមួយគ្នានេះដែរ ឯកឧត្តមរដ្ឋមន្ត្រី បានស្នើឱ្យរដ្ឋបាលខេត្ត និងមន្ទីរទេសចរណ៍ខេត្តកែប ចូលរួមអនុវត្តចលនាប្រឡងប្រណាំងទីក្រុងស្អាតលើកទី៤ សុពលភាព ឆ្នាំ២០២៦-២០២៩ និងផ្តល់ការសហការជាមួយក្រុមការងារចុះវាយតម្លៃទីក្រុងស្អាតរបស់ក្រសួងទេសចរណ៍, និងអនុវត្តយុទ្ធនាការ «រដូវកាលបៃតង (Green Season)» ព្រមទាំងជួយជំរុញការលើកផ្លាករមណីយដ្ឋានទេសចរណ៍នៅតាមផ្លូវជាតិ ព្រំប្រទល់ចូលខេត្ត និងនៅតាមតំបន់រមណីយដ្ឋាននានា ដើម្បីទាក់ទាញភ្ញៀវទេសចរជាតិ និងអន្តរជាតិ ជាពិសេសបង្កើតផលិតផលទេសចរណ៍ និង ព្រឹត្តិការណ៍ទេសចរណ៍ថ្មីៗប្រកបដោយភាពច្នៃប្រឌិតខ្ពស់ និងដោយរក្សាអត្តសញ្ញាណខេត្ត និងតំបន់ ៕
