ទីក្រុងណាហ្គូយ៉ា៖ នារសៀលថ្ងៃទី២៥ ខែកញ្ញា ឆ្នាំ២០២៥ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានជួបពិភាក្សាការងារកម្រិតខ្ពស់ជាមួយឯកឧត្តម Shigeki Murata ស្នងការនៃទីភ្នាក់ងារទេសចរណ៍ជប៉ុន (The Commissioner of the Japan Tourism Agency-JTA) និងសហការី អំពីការបង្កើតនូវកិច្ចសហប្រតិបត្តិការទេសចរណ៍រវាងកម្ពុជា និងស្នងការនៃទីភ្នាក់ងារទេសចរណ៍ជប៉ុន (The Commissioner of the Japan Tourism Agency-JTA)។
ក្នុងជំនួបដ៏មានសារៈសំខាន់ និងប្រកបដោយផ្លែផ្កាលើការបង្កើតកិច្ចសហប្រតិបត្តិការនេះ ឯកឧត្តមរដ្ឋមន្រ្តី បានគូសបញ្ជាក់ពីកត្តាសុខសន្តិភាព ស្ថិរភាពនយោបាយ និងសង្គម សណ្តាប់ធ្នាប់សាធារណៈល្អប្រសើរ សុវត្ថិភាពភ្ញៀវទេសចរអន្តរជាតិដែលត្រូវបានផ្តល់កិច្ចធានាដោយរាជរដ្ឋាភិបាលកម្ពុជា។
ទន្ទឹមនឹងនេះដែរ ឯកឧត្តមរដ្ឋមន្រ្តី បានជម្រាបជូនឯកឧត្តមស្នងការនៃទីភ្នាក់់ងារទេសចរណ៍ជប៉ុនពីសក្តានុពលទេសចរណ៍កម្ពុជាដែលជាទីផ្សារថ្មី ប្រកបដោយសក្តានុពល និងពោរពេញដោយកាលានុវត្តវិនិយោគ ដែលត្រូវការការវិនិយោគលើវិស័យទេសចរណ៍យ៉ាងច្រើនពីវិនិយោគិនបរទេស និងការចុះអនុស្សារណៈនៃការយោគយល់គ្នារវាងក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា ការរៀបចំជា Famtrip មកប្រទេសកម្ពុជា និងការជួបពិភាក្សាគ្នារៀបចំជា Roadshow ពីគោលដៅទេសចរណ៍នៃប្រទេសទាំងពីរ។
គូភាគីទាំងពីរ ក៏បានឯកភាពសហការផ្សព្វផ្សាយសក្តានុពលទេសចរណ៍នៃប្រទេសទាំងពីរ ដើម្បីជំរុញ និងបង្កើនចំនួនភ្ញៀវទេសចរជាតិ និងអន្តរជាតិមកទស្សនាប្រទេសទាំងពីរឱ្យបានកាន់តែច្រើនឡើង រួមទាំងការអញ្ជើញចូលរួមព្រឹត្តការណ៍ជំរុញទេសចរណ៍ធំៗ និងជាលក្ខណៈអន្តរជាតិនាពេលខាងមុខនេះ។
សូមបញ្ជាក់ជូនថា ស្នងការនៃទីភ្នាក់ងារទេសចរណ៍ជប៉ុន (The Commissioner of the Japan Tourism Agency-JTA) ជាទីភ្នាក់ងារមួយនៅចំណុះក្រោមក្រសួងរៀបចំដែនដី ហេដ្ឋារចនាសម័ន្ធ ដឹកជញ្ជូន និងទេសចរណ៍របស់ប្រទេសជប៉ុនដែលមានភារកិច្ចជំរុញផ្សព្វផ្សាយទេសចរណ៍ជប៉ុន ៕
