ភ្នំពេញ៖ នាថ្ងៃពុធ ១០រោច ខែភទ្របទ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៧ ខែកញ្ញា ឆ្នាំ២០២៥ ក្រុមប្រឹក្សាអ្នកច្បាប់ បានបើកកិច្ចប្រជុំពិនិត្យ និងពិភាក្សាលើ៖
១-ករណីសំណើសុំគោលការណ៍អនុញ្ញាតកំណត់យកថ្ងៃទី៧ ខែធ្នូ ជារៀងរាល់ឆ្នាំ ដើម្បីរៀបចំប្រារព្ធពិធី «ទិវាអាកាសចរណ៍ស៊ីវិល Civil Aviation Day» នៅកម្ពុជា។
២-សំណើសុំគោលការណ៍អនុញ្ញាតផ្តល់សច្ចាប័នលើឯកសារកិច្ចព្រមព្រៀង និងពិធីសារអាស៊ាន មានដូចខាងក្រោម៖
ក-កិច្ចព្រមព្រៀងគ្រប់ជ្រុងជ្រោយ ស្តីពីការដឹកជញ្ជូនតាមផ្លូវអាកាស រវាងរដ្ឋាភិបាលនៃរដ្ឋសមាជិក សមាគមប្រជាជាតិអាស៊ីអាគ្នេយ៍ និងសហភាពអឺរ៉ុប និងរដ្ឋសមាជិករបស់ខ្លួន
ខ-ពិធីសារទី៣ ស្ដីពីការពង្រីកសិទ្ធិហោះហើរទី៥ រវាងភាគីចុះកិច្ចព្រមព្រៀង ក្រោមកិច្ចព្រមព្រៀងដឹកជញ្ជូនតាមផ្លូវអាកាសរវាងរដ្ឋាភិបាលនៃរដ្ឋសមាជិកសមាគមប្រជាជាតិអាស៊ីអាគ្នេយ៍ និងរដ្ឋាភិបាលនៃសាធារណរដ្ឋប្រជាមានិតចិន
គ-ពិធីសារអនុវត្តកញ្ចប់កិច្ចសន្យាទី១១ និងទី១២ នៃសេវាកម្មដឹកជញ្ជូនតាមផ្លូវអាកាស ក្រោមកិច្ចព្រមព្រៀងក្របខ័ណ្ឌអាស៊ាន ស្តីពីសេវាកម្ម។
៣-សំណើសុំរៀបចំអនុក្រឹត្យស្ដីពីការកំណត់តំបន់ប្រើប្រាស់ដោយចីរភាព និងការធ្វើអនុប្បយោគប្តូរចំណាត់ថ្នាក់ពីទ្រព្យសម្បត្តិសាធារណៈរបស់រដ្ឋមកជាទ្រព្យសម្បត្តិឯកជនរបស់រដ្ឋ លើផ្ទៃដីទំហំ ១៧១,៧៧៧៨ (មួយរយចិតសិបមួយហិកតា ចិតសិបប្រាំពីរអា និងចិតសិបប្រាំបីសង់ទីអា) ហិកតា ស្ថិតក្នុងដែនជម្រកសត្វព្រៃកែវសីមា ឃុំសែនមនោរម្យ ស្រុកអូររាំង ខេត្តមណ្ឌលគិរី សម្រាប់ជួលអចិន្ត្រៃយ៍ ក្រុមហ៊ុន ឌី.ធី.ស៊ី.គ្រុប (D.T.C Group Co.,LTD) វិនិយោគលើគម្រោងអភិវឌ្ឍន៍ទេសចរណ៍ធម្មជាតិ។
កិច្ចប្រជុំដ៏មានសារៈសំខាន់នេះ ស្ថិតក្រោមអធិបតីភាពរបស់ឯកឧត្តម លី ច័ន្ទតុលា អនុប្រធាននិងជាប្រធានក្រុមការងារទី២ក្រុមប្រឹក្សាអ្នកច្បាប់ ដោយមានការអញ្ជើញចូលរួមពី ឯកឧត្ដម លោកជំទាវ សមាជិកក្រុមប្រឹក្សាអ្នកច្បាប់, អគ្គលេខាធិការរង, ប្រធាននាយកដ្ឋាន ព្រមទាំងមន្ត្រីក្រុមប្រឹក្សាអ្នកច្បាប់ ៕
