ភ្នំពេញ៖ ឯកឧត្តម វេង សាខុន សមាជិកគណៈកម្មការទី៣ នៃរដ្ឋសភា និងឯកឧត្តម សន សារ៉ាណា សមាជិកគណៈកម្មការទី៥ នៃរដ្ឋសភា នៅរសៀលថ្ងៃទី១៧ ខែកញ្ញា ឆ្នាំ២០២៤ បានអញ្ជើញចូលរួមក្នុងកិច្ចប្រជុំសវនាការរវាងអាយប៉ា និងអាស៊ាន នៃមហាសន្និបាតអាយប៉ា លើកទី៤៦ ដែលសភាប្រទេសម៉ាឡេស៊ីធ្វើជាម្ចាស់ផ្ទះ នៅទីក្រុងគូឡាឡាំពួ។
កិច្ចប្រជុំមានការចូលរួមដោយគណៈប្រតិភូមកពីសភាប្រទេសព្រុយណេ កម្ពុជា ឡាវ ម៉ាឡេស៊ី ហ្វីលីពីន សិង្ហបុរី ថៃ និងវៀតណាម និងមានការចូលរួមពីជំនាញការនៃអគ្គលេខាធិការដ្ឋានអាស៊ាន ផងដែរ ក្រោមប្រធានបទ “ការកសាងអនាគត ប្រកបដោយបរិយាបន្ន និងចីរភាព” (Theme: Forging an Inclusive and Sustainable Future)។
នៅក្នុងកិច្ចប្រជុំនេះ ក៏មានការធ្វើបទបង្ហាញដោយជំនាញការនៃអគ្គលេខាធិការដ្ឋានអាស៊ានពាក់ព័ន្ធទៅនឹងមជ្ឈមណ្ឌលសម្របសម្រួលជំនួយមនុស្សធម៌អាស៊ានសម្រាប់ការគ្រប់គ្រងគ្រោះមហន្តរាយ។
ចុងបញ្ចប់កិច្ចប្រជុំបានបញ្ជាក់ពីការពង្រឹងកិច្ចសហប្រតិបត្តិការរវាងអាយប៉ា និងអាស៊ាន ដើម្បីបង្កើតនូវដំណោះស្រាយ នវានុវត្តន៍ និងការផ្លាស់ប្តូរបទពិសោធន៍ល្អៗ និងរៀបចំអនុសាសន៍ជាក់លាក់ ក្នុងតំបន់និងសហគមន៍អាស៊ាន ប្រកបដោយបរិយាបន្ន និងចីរភាព។
សូមជម្រាបថា នេះជាឆ្នាំទី៤ហើយដែលអាយប៉ា បានបង្កើតឱ្យមានជំនួបសវនាការនេះឡើង។ កិច្ចប្រជុំនេះ បានបង្កើតឡើងកាលពីឆ្នាំ២០២២ នៅពេលសភាកម្ពុជាធ្វើជាម្ចាស់ផ្ទះមហាសន្និបាតអាយប៉ា លើកទី៤៣ ៕
