ភ្នំពេញ៖ ឯកឧត្តម ឧត្តមសេនីយ៍ឯក លឹម សុខារស្មី ប្រធាននាយកដ្ឋានគ្រប់គ្រងសន្ដិសុខឯកជន នៃអគ្គស្នងការដ្ឋាននគរបាលជាតិ នៅល្ងាចថ្ងៃពុធ ទី២៧ ខែសីហា ឆ្នាំ២០២៥ បានបញ្ជាក់ដោយហាមដាច់ខាត មិនឲ្យមានការកសាងកម្លាំងខុសច្បាប់ណាមួយកើតឡើង តាមរយៈក្រុមហ៊ុនផ្ដល់សេវាសន្ដិសុខឯកជន ជាពិសេសមិនអនុញ្ញាតឲ្យប្រើប្រាស់សន្ដិសុខឯកជន ជាជនបរទេសនោះទេ។
ក្នុងឱកាសអញ្ជើញជាអធិបតី ពិធីបិទវគ្គបំប៉នជំនាញភ្នាក់ងារសន្តិសុខឯកជនលើកទី៧៧ ឯកឧត្តម ឧត្តមសេនីយ៍ឯក លឹម សុខារស្មី បានសង្កត់ធ្ងន់ទៀតថា ក្រុមហ៊ុនផ្ដល់សេវាសន្ដិសុខឯកជន ក៏មិនត្រូវប្រើប្រាស់កម្លាំងសមត្ថកិច្ចដែលបំពាក់ដោយអាវុធ ដើម្បីបម្រើសេវានោះទេ។
ឯកឧត្តម ឧត្តមសេនីយ៍ឯក បន្ដថា សន្ដិសុខឯកជន ក៏មិនត្រូវធ្វើសកម្មភាពរារាំងកម្លាំងសមត្ថកិច្ចចុះប្រតិបត្តិការបង្ការបង្ក្រាបបទល្មើស ឬឃុបឃិតជាមួយម្ចាស់គោលដៅប្រព្រឹត្តបទល្មើសនានា ពិសេសបទល្មើសឆបោកតាមប្រព័ន្ធ Online។ ផ្ទុយទៅវិញ វិស័យសន្តិសុខឯកជន បានដើរតួនាទីយ៉ាងសំខាន់ ក្នុងការរួមចំណែកថែរក្សាសន្តិសុខ សុវត្ថិភាព សណ្តាប់ធ្នាប់ ស្ថេរភាពនយោបាយ ជូនសង្គមជាតិទាំងមូលផងដែរ និងដែលជាកម្លាំងជំនួយដល់សមត្ថកិច្ចក្នុងការចូលរួមសហការបង្ការ ទប់ស្កាត់ និងបង្ក្រាបបទល្មើស នៅតាមទីតាំងឯកជន និងតាមសាធារណៈ។ មួយវិញទៀត គឺការចូលរួមយ៉ាងសកម្មក្នុងការអនុវត្តគោលនយោបាយ «ភូមិ-ឃុំ សង្កាត់ មានសុវត្ថិភាព» សំដៅថែរក្សាសន្តិសុខ សណ្តាប់ធ្នាប់សង្គម ក៏ដូចជាការពារផលប្រយោជន៍ជាតិ និងការអភិវឌ្ឍន៍ប្រទេសជាតិផងដែរ។
ក្នុងន័យនេះ ឯកឧត្តម ឧត្តមសេនីយ៍ឯក លឹម សុខារស្មី ក៏បានកោតសរសើរដល់ភ្នាក់ងារសន្តិសុខឯកជន បានសហការ និងផ្តល់កិច្ចសហការចូលរួមបង្ការទប់ស្កាត់បទល្មើសនានា នៅតាមទីតាំងគោលដៅរបស់ខ្លួន ធ្វើឲ្យបទល្មើសមានការកាត់បន្ថយមួយចំនួនផងដែរ។ តែទោះជាយ៉ាងនេះក្តី ឯកឧត្តម ឧត្តមសេនីយ៍ឯក ប្រធាននាយកដ្ឋាន បានកត់សម្គាល់ថា បច្ចុប្បន្ននេះបទល្មើសមួយចំនួន បានកើតឡើងទៅតាមទីតាំងស្នាក់នៅ ដែលក្រុមឧក្រិដ្ឋជនពួនសម្ងំ ប្រព្រឹត្តបទល្មើសពិសេសដូចជា៖ ការផលិតគ្រឿងញៀន ការចែកចាយ-ប្រើប្រាស់គ្រឿងញៀន ការបង្ខាំងមនុស្សខុសច្បាប់ ការចាប់ជំរឹតទារប្រាក់ ការជួញដូរមនុស្ស ការជួញដូរកម្លាំងពលកម្ម ការឆបោកតាមប្រព័ន្ធបច្ចេកវិទ្យា ជាដើម។
ឯកឧត្តម ឧត្តមសេនីយ៍ឯក លឹម សុខារស្មី បានក្រើនរំលឹក និងណែនាំដល់ភ្នាក់ងារសន្ដិសុខឯកជន ត្រូវបន្ដយកចិត្តទុកដាក់ពង្រឹងវិធានការសន្តិសុខ សុវត្ថិភាព និងត្រូវផ្តល់កិច្ចសហការជាមួយសមត្ថកិច្ចមូលដ្ឋាន ឬសមត្ថកិច្ចជំនាញ ក្នុងការបង្រ្កាបបទល្មើសនៅតាមទីតាំងរស់នៅដូចជា៖ បុរី ខុនដូរ អាតមិន សណ្ឋាគារ កាស៊ីណូ រីសត និងសំណង់អគារធំៗ ដែលជាកន្លែងលាក់ខ្លួនរបស់ក្រុមឧក្រិដ្ឋជនប្រព្រឹត្តបទល្មើស។
ឯកឧត្តម ឧត្តមសេនីយ៍ឯក ប្រធាននាយកដ្ឋាន ជឿជាក់ថា សិក្ខាកាមទាំងអស់ បានខិតខំប្រឹងប្រែងយកចិត្តទុកដាក់អស់កម្លាំងកាយចិត្ត ហើយទទួលបានចំណេះដឹងជាច្រើន ដែលសន្តិសុខឯកជនបាននិងកំពុងជួបប្រទះកន្លងមក ដើម្បីយកទៅបំពេញតួនាទីរបស់ខ្លួនបម្រើផលប្រយោជន៍សង្គមជាតិក្នុងផ្លូវវិជ្ជមាន ឲ្យបានសមស្របតាមក្រមសីលធម៌ វិជ្ជាជីវៈរបស់សន្តិសុខឯកជន និងអនុលោមទៅតាមច្បាប់នៃព្រះរាជាណាចក្រកម្ពុជា។
ឯកឧត្តម ឧត្តមសេនីយ៍ឯក លឹម សុខារស្មី ក៏បានលើកទឹកចិត្តសិក្ខាកាម ត្រូវយកចំណេះដឹងដែលទទួលបានពេលនេះ ទៅផ្សព្វផ្សាយ និងចែករំលែកបន្តដល់មិត្តរួមការងារ មិត្តភ័ក្រ ក្រុមគ្រួសារ ឬប្រជាពលរដ្ឋដ៏ទៃទៀត ឲ្យបានយល់ដឹងអំពីសារៈសំខាន់ នៃការថែរក្សាសន្តិសុខ សុវត្ថិភាព អាយុជីវិត និងសណ្តាប់ធ្នាប់សង្គម ព្រមទាំងការចូលរួមចំណែកអនុវត្តគោលនយោបាយ «ភូមិ-ឃុំ សង្កាត់ មានសុវត្ថិភាព» របស់រាជរដ្ឋាភិបាល ៕
