ភ្នំពេញ៖ បន្ទាប់ពីបានប្រឡងប្រជែងជ្រើសរើស មន្ត្រីបច្ចេកទេសវិជ្ជាជីវៈសុខាភិបាលផ្អែកលើកិច្ចព្រមព្រៀងការងាររួចមក ក្រសួងមុខងារសាធារណៈ និងក្រសួងសុខាភិបាលបានបន្តពិភាក្សាគ្នាមួយកម្រិតទៀត ដើម្បីរៀបចំនីតិវិធី និងយន្តការក្នុងការដាក់បញ្ចូលមន្ត្រីផ្អែកលើកិច្ចព្រមព្រៀងការងារ ទៅតាមគោលដៅការងារនីមួយៗ។
កិច្ចប្រជុំនារសៀលថ្ងៃទី២២ ខែសីហា ឆ្នាំ២០២៥ ដែលដឹកនាំដោយ ឯកឧត្ដម យក់ ប៊ុនណា រដ្ឋលេខាធិការប្រចាំការនៃក្រសួងមុខងារសាធារណៈ បានពិភាក្សាទៅលើការកំណត់នូវកាលបរិច្ឆេទ នៃការបំពេញព័ត៌មាន និងនីតិវិធីនានា សំដៅដល់ការចាប់ផ្តើមគន្លងអាជីពជាមន្ត្រីផ្អែកលើ កិច្ចព្រមព្រៀងការងារ។
ជាលទ្ធផលអង្គប្រជុំបានសម្រេចទៅលើ ការកំណត់ពេលវេលាចូលបំពេញការងារ និងទិដ្ឋភាពនៃការអនុវត្តការងារដទៃទៀតជាច្រើនក្នុងគោលដៅ ផ្តល់ឧត្តមប្រយោជន៍ជូនទៅដល់មន្ត្រី។ ក្រោយកិច្ចប្រជុំនេះ ក្រុមការងារ នឹងរៀបចំរបាយការណ៍ជូនទៅដល់ថ្នាក់ដឹកនាំពិនិត្យនិងសម្រេច ដើម្បីឈានទៅការជូនដំណឹងដល់មន្ត្រីឆាប់បានបំពេញការងារតាមមណ្ឌលសុខភាពដែលខ្លួនបានជ្រើសរើស ៕
