ភ្នំពេញ៖ នៅថ្ងៃទី២៨ ខែសីហា ឆ្នាំ២០២៥ ឯកឧត្តម ទូច ណារ៉ុថ រដ្ឋលេខាធិការ ក្រសួងមហាផ្ទៃ បានអញ្ជើញជាអធិបតីក្នុងកិច្ចប្រជុំត្រួតពិនិត្យវឌ្ឍនភាពនៃការអនុវត្តគោលនយោបាយ "ភូមិ ឃុំ-សង្កាត់មានសុវត្ថិភាព" ប្រចាំឆមាសទី១ ឆ្នាំ២០២៥ របស់រដ្ឋបាលខេត្តស្ទឹងត្រែងដែលប្រារព្ធឡើងនៅសាលប្រជុំធំសាលាខេត្តស្ទឹងត្រែង។
កិច្ចប្រជុំនេះមានការអញ្ជើញចូលរួមពីឯកឧត្តម ឈាង ឡាក់ ប្រធានក្រុមប្រឹក្សាខេត្ត ឯកឧត្តម សរ សុពុត្រា អភិបាល នៃគណៈអភិបាលខេត្តស្ទឹងត្រែង ព្រមទាំងថ្នាក់ដឹកនាំមន្ត្រីរាជការ និងកងកម្លាំងប្រដាប់អាវុធជាច្រើនរូប។
កិច្ចប្រជុំនេះមានគោលបំណងចម្បង ដើម្បីត្រួតពិនិត្យការអនុវត្តគោលនយោបាយ “ភូមិ ឃុំ សង្កាត់ មានសុវត្ថិភាព” ព្រមទាំងលើកទិសដៅបន្ត និងទទួលយកអនុសាសន៍ណែនាំបន្ថែមពីថ្នាក់ដឹកនាំ ដើម្បីលើកកម្ពស់ប្រសិទ្ធភាពការងារ។
ក្នុងសុន្ទរកថាស្វាគមន៍ ឯកឧត្តម សរ សុពុត្រា អភិបាលខេត្តស្ទឹងត្រែងបានលើកឡើងថា ខេត្តស្ទឹងត្រែងបានរក្សាសន្តិសុខ និងសណ្តាប់ធ្នាប់សាធារណៈនៅក្នុងមូលដ្ឋានបានយ៉ាងល្អប្រសើរគួរឱ្យកត់សម្គាល់។
ឯកឧត្តមបានបន្តថា កងកម្លាំងសមត្ថកិច្ច និងប្រជាការពារបានរួបរួមគ្នាបង្កើនការល្បាត ការដាក់វេនយាមប្រចាំការយ៉ាងប្រទាក់ក្រឡា ដើម្បីទប់ស្កាត់បទល្មើសផ្សេងៗ។
ឯកឧត្តមអភិបាលខេត្ត ក៏បានគូសបញ្ជាក់អំពីការបង្ក្រាបបទល្មើសគ្រឿងញៀនជាបន្តបន្ទាប់ បទល្មើសនានាក្នុងមូលដ្ឋាន ជាពិសេសករណីជំរិតទារប្រាក់តាមរយៈគណនីហ្វេសប៊ុក ដែលបានកើតឡើងក្នុងពន្ធនាគារខេត្តកាលពីពេលថ្មីៗនេះ។
ឯកឧត្តម ទូច ណារ៉ុថ រដ្ឋលេខាធិការក្រសួងមហាផ្ទៃ បានវាយតម្លៃខ្ពស់ និងកោតសរសើរចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងអាជ្ញាធរខេត្តស្ទឹងត្រែង ក្នុងការរក្សាសន្តិសុខសណ្តាប់ធ្នាប់ និងចូលរួមអនុវត្តគោលនយោបាយភូមិ ឃុំ មានសុវត្ថិភាព។
ឯកឧត្តមរដ្ឋលេខាធិការ បានជំរុញឱ្យកងកម្លាំងមានសមត្ថកិច្ចគ្រប់លំដាប់ថ្នាក់បន្តទប់ស្កាត់បទល្មើសសំខាន់ៗដែលជាកង្វល់របស់ប្រជាពលរដ្ឋ ដូចជាចោរលួច ចោរប្លន់ និងគ្រឿងញៀន។
ឯកឧត្តមរដ្ឋលេខាធិការ ក៏បានសង្កត់ធ្ងន់ថា ការអនុវត្តគោលនយោបាយ “ភូមិ ឃុំ សង្កាត់ មានសុវត្ថិភាព” អាចទទួលបានជោគជ័យលុះត្រាតែមានការចូលរួមពីគ្រប់ភាគីពាក់ព័ន្ធទាំងអស់ រួមមានអាជ្ញាធរ កងកម្លាំងមានសមត្ថកិច្ច មន្ទីរអង្គភាព អាជ្ញាធរមូលដ្ឋាន និងប្រជាពលរដ្ឋ ៕
